Kimberly Guilfoyle, fyrrverandi unnusta Donald Trump yngri, hefur haft dularfullan kaupsýslumann sér við hlið í starfi sínu sem sendiherra Bandaríkjanna í Grikklandi, að því er fram kemur í frétt Yahoo! News.
Guilfoyle hefur í embætti sínu unnið að samningum við Evrópuríki um kaup á fljótandi jarðgasi frá Bandaríkjunum, með það að markmiði að draga úr og að lokum hætta notkun á rússneskri orku.
Hin 57 ára Guilfoyle hefur ferðast víða um Evrópu og reynt að fá stjórnmálamenn til að kaupa bandarískt jarðgas fyrir milljarða Bandaríkjadala.
Samkvæmt The Wall Street Journal hefur 39 ára kaupsýslumaðurinn Christos Marafatsos verið reglulegur fylgdarmaður hennar í þessum ferðum.
Hann hefur verið viðstaddur svo marga mikilvæga fundi með Guilfoyle að sumir erlendir embættismenn hafi að sögn talið að hann væri starfsmaður hennar.
Marafatsos er hins vegar hagsmunagæslumaður fyrir Aktor, grískt innviða- og orkufyrirtæki sem nýlega gerði sex milljarða dala samning um að selja fljótandi jarðgas frá Bandaríkjunum til Albaníu, þrátt fyrir að fyrirtækið sé tiltölulega nýtt á þessum markaði.
Samkvæmt Wall Street Journal hefur Guilfoyle ítrekað kynnt fyrirtækið.
Í Búlgaríu hafi hún til að mynda sagt stjórnvöldum þar að þau ættu að eiga viðskipti við Aktor.
Einstaklingur sem þekkir til viðræðnanna sagði samkvæmt miðlinum:
„Það er enginn vafi á því að þetta er nokkurs konar opinber afstaða bandarískra stjórnvalda.“
Embættismenn sem hafa hitt Marafatsos og sendiherrann segja að hann hafi ekki greint frá tengslum sínum við Aktor á fundunum.
Robin Brooks, starfsmaður bandarísku utanríkisþjónustunnar sem var forstöðumaður Balkanskaga og Mið-Evrópu hjá þjóðaröryggisráði Bandaríkjanna í stjórnartíð Joe Biden, segir slíka kynningu „mjög vafasama“.
Að taka skráðan hagsmunagæslumann með á fundi með erlendum embættismönnum „vekur upp spurningar um hvort fundurinn sé að stuðla að hagsmunum Bandaríkjanna eða einhvers konar einkahagsmunum“, sagði hún.
Embættismaður hjá bandaríska sendiráðinu í Grikklandi sagði hins vegar að Guilfoyle hefði fylgt öllum leiðbeiningum bandaríska utanríkisráðuneytisins í ferð sinni til Búlgaríu, þrátt fyrir ásakanir um hagsmunagæslu.
Þegar samningurinn við Albaníu var staðfestur í apríl sagði Guilfoyle:
„Það var mér heiður að ferðast til Tirana til að vinna að orkumálastefnu POTUS [forseta Bandaríkjanna] og taka þátt með Edi Rama forsætisráðherra í undirritun sögulegs samnings milli Albaníu, Venture Global og Aktor LNG USA um 20 ára samning um bandarískt LNG.“
Samningurinn er hluti af svokölluðum „lóðréttum gasgangi“ sem á að tryggja ríkjum í Mið-, Austur- og Suðaustur-Evrópu aðgangi að ríkulegu magni af jarðgasi frá öðrum uppsprettum en Rússlandi.
Donald Trump tilnefndi Guilfoyle, fyrrverandi þáttastjórnanda á Fox og lögfræðing, sem sendiherra Bandaríkjanna í Grikklandi í desember 2024.
Á þeim tíma lýsti hann henni sem „náinni vinkonu og bandamanni“ og sagði hana „fullkomlega til þess fallna að efla sterk tvíhliða tengsl við Grikkland“ og vinna að bandarískum hagsmunum á sviðum allt frá varnarsamstarfi til viðskipta og efnahagslegrar nýsköpunar.
Athugasemdir