Maðurinn sem uppljóstraði um hin fjölmörgu brot Manchester City, Rui Pinto hefur nú verið sviptur vernd ríkisins.
Pinto stofnaði Football Leaks og hefur með uppljóstrunum sínum hjálpað til við að afhjúpa myrku hliðarnar á fótboltanum utan vallar.
Í janúar 2017 komst hann yfir einhver dýpstu og myrkustu leyndarmál Manchester City með því að nýta sér tölvupóst sem notaður var í vefveiðaárás (e. phising). Síðustu daga hefur hann fagnað niðurstöðu málsins gegn félaginu á samfélagsmiðlum, eftir að úrskurður um sekt City var gerður opinber.
„Áralangt svindl, lygar og misnotkun munu loksins hafa afleiðingar,“ skrifaði hann í einni af fjölmörgum færslum sínum á samfélagsmiðlinum X.
Pinto telur sig eflaust hafa fengið uppreisn æru með niðurstöðu óháðrar nefndar ensku úrvalsdeildarinnar. Manchester City hefur þó ítrekað haldið fram sakleysi sínu og staðfest að félagið hyggist áfrýja niðurstöðunni.
Portúgalski uppljóstrarinn hefur hins vegar fengið slæmar fréttir. Á miðvikudag staðfestu portúgölsk yfirvöld að hann nyti ekki lengur verndar sem vitni. Pinto, sem er 37 ára, hefur verið undir vernd ríkisins frá árinu 2020 og meðal annars búið í öruggu húsnæði á vegum yfirvalda. Verndin verður afturkölluð 10. október.
Þrátt fyrir að nýlegir atburðir hafi beint kastljósinu að honum á ný hafa yfirvöld nú metið áhættuna sem steðjar að honum litla. Honum hefur verið ráðlagt að halda sig frá samfélagsmiðlum, hafa ekki samband við fjölskyldu sína og forðast fjölmenna staði.
Í yfirlýsingu á föstudag kröfðust lögmenn hans þess að ákvörðunin yrði afturkölluð. Þeir kölluðu hana „skammarlegar aðgerðir“ og líktu henni jafnvel við „hryðjuverk ríkisins“.
„Staða hans er nú orðin afar alvarleg. Hótanirnar gegn honum eru ekki aðeins fræðilegar; ráðist var á hann í Lissabon í apríl síðastliðnum,“ segir í yfirlýsingunni.
„Uppljóstranir hans vörðuðu áhrifamikið fólk með gríðarleg fjárráð og mörg þeirra mála sem þær leiddu af sér eru enn til meðferðar. Það sést meðal annars á niðurstöðu sem óháð nefnd ensku úrvalsdeildarinnar kvað upp fyrir örfáum dögum vegna Manchester City.
Með því að vera skyndilega sviptur vernduðu húsnæði sínu og skilinn eftir í afar ótryggri stöðu er Rui Pinto nú berskjaldaðri en nokkru sinni frá árinu 2020.“
Lögmenn Pinto segja að honum hafi borist líflátshótanir eftir að hann lagði mikið í sölurnar til að afhjúpa misferli á bak við tjöldin í fótboltaelítunni. Hann kallar sig uppljóstrara en hefur jafnframt verið dæmdur fyrir tölvuárásir.
Í september 2023 var Pinto, sem áður stundaði sagnfræðinám í Porto, dæmdur í fjögurra ára skilorðsbundið fangelsi. Hann var fundinn sekur um tilraun til fjárkúgunar, ólöglegan aðgang að gögnum og brot á friðhelgi bréfaskipta. Málið tengdist leka gagna frá Doyen Sports, fjárfestingarsjóði og umboðsskrifstofu.
Pinto hafði áður verið þekktur undir dulnefninu „John“, áður en raunverulegt nafn hans kom í ljós. Hann hafði brotist inn í tölvukerfi Doyen Sports og lekið fjölda skjala sem vöktu heimsathygli.
Hann var framseldur frá Ungverjalandi til Portúgals í mars 2019 til að svara til saka. Pinto hafði þá búið í höfuðborginni Búdapest. Framsalið átti sér stað aðeins nokkrum mánuðum eftir að fyrstu ásakanirnar á hendur Manchester City komu fram.
Í nóvember 2018 birti þýska tímaritið Der Spiegel fréttir byggðar á gögnum sem Pinto hafði stolið. Þar var því haldið fram að Manchester City hefði brotið fjárhagsreglur til að ná forskoti á keppinauta sína. Þessar afhjúpanir leiddu fyrst til ákæru UEFA á hendur félaginu og síðar til málsins hjá ensku úrvalsdeildinni, en niðurstaða þess hefur nú loks verið kynnt.
UEFA bannaði Manchester City upphaflega þátttöku í evrópskum keppnum í tvö ár. Banninu var síðar hnekkt eftir áfrýjun til Alþjóðaíþróttadómstólsins (CAS).
Í máli ensku úrvalsdeildarinnar voru meðal annars notaðir tölvupóstar starfsmanna Manchester City sem Pinto hafði komist yfir með tölvuárásum og félagið hafði ekki afhent deildinni.
Uppljóstranir Pinto áttu þátt í því að enska úrvalsdeildin gat gengið mun lengra í ásökunum sínum en UEFA hafði gert. Alls hafa 114 ásakanir verið staðfestar.
Athugasemdir