Fjöldi fólks slasaðist þegar elding sló niður í tré í skemmtigarði í suðurhluta Svíþjóð á sunnudag. Ein kona hlaut alvarlega áverka en fleiri slösuðust lítillega.

Atvikið átti sér stað í skemmtigarðinum Tosselilla Sommarland þegar öflugt þrumuveður gekk yfir svæðið. Forsvarsmenn garðsins greindu frá því að eldingar hefðu slegið niður víða á svæðinu og að nokkrir gestir hefðu slasast í kjölfarið.

Í fyrstu var talið að enginn hefði hlotið alvarlega áverka. Síðar upplýstu heilbrigðisyfirvöld í Skáni að 45 ára kona hefði verið flutt á sjúkrahús með alvarlega áverka.

Tveir til viðbótar voru fluttir með sjúkrabíl á sjúkrahús, en tveir fullorðnir og fimm börn leituðu sér einnig læknisaðstoðar vegna minni háttar meiðsla.

Samkvæmt sænska ríkissjónvarpinu hafði skemmtigarðurinn gripið til varúðarráðstafana áður en veðrið skall á. Gestum hafði verið gert að yfirgefa öll leiktæki og sundlaugar vatnagarðsins vegna yfirvofandi þrumuveðurs.

Þrátt fyrir það sló elding niður í tré innan garðsins. Tréð skemmdist við höggið og brot úr því féllu yfir hóp fólks sem átti leið hjá, með þeim afleiðingum að nokkrir slösuðust.

Veðurstofa Svíþjóðar hafði áður gefið út viðvaranir fyrir stór svæði í suðurhluta landsins vegna þrumuveðurs og mikillar úrkomu sem gekk yfir svæðið á sunnudag.