Farþegar á farþegaflugi Air Canada frá Newark í New Jersey til Halifax í Nova Scotia urðu vitni að óhugnanlegu atviki á miðvikudag.

Samkvæmt fréttum erlendra fjölmiðla er talið að flugstjórinn hafi fengið krampaflog sem stóð í um 40 mínútur. Aðstoðarflugmaður tók þegar við stjórn flugvélarinnar og ákvað að beina henni til lendingar á Logan-alþjóðaflugvellinum í Boston. Lendingin gekk áfallalaust fyrir sig.

Rodney McDonald, einn farþega vélarinnar, sagði í samtali við ABC News að hann og fjölskylda hans hefðu strax áttað sig á því að eitthvað væri ekki með felldu þegar flugvélin tók skyndilega snögga stefnubreytingu.

„Þetta var ekki eins og ókyrrð heldur eins og einhver hefði kippt í stjórntækin,“ sagði McDonald.

Að sögn McDonalds fór einn flugþjónanna inn í stjórnklefann og dró flugstjórann út í gang vélarinnar þar sem hann virtist vera að fá krampaflog. McDonald og þrír aðrir farþegar brugðust þá við og aðstoðuðu áhöfnina við að halda flugstjóranum kyrrum þar til vélin hafði lent örugglega.

Við lendingu beið sjúkraflutningafólk flugstjórans og var hann fluttur á sjúkrahús til frekari meðferðar. Ekki hefur verið greint frá líðan hans eða ástandi.