„Nennirðu kannski að skutla þessu niður á fréttastofu. Þau eru að bíða eftir þessu. Þetta er óflokkað rusl,“ segir Biggi Veira við starfsmann í móttöku Ríkisútvarpsins, þar sem hann afhendir ruslapoka.
Biggi, eða Birgir Þórarinsson, er þekktur sem tónlistarmaður úr hljómsveitinni GusGus, en hann er einnig varaþingmaður Samfylkingarinnar. Hann segir í Facebookfærslu við myndbandið að um sé að ræða heimilissorpið hans.
„Hægt að skuttla inní andyrið eða skilja eftir fyrir utan. Það kemst til skila. Grófari úrgangur fer ennþá uppá Morgunblað,“ segir hann.
Um er að ræða mótmæli vegna umfjöllunar RÚV um ástarmál Ásthildar Lóu Þórsdóttur, sem sagði af sér embætti barna- og menntamálaráðherra eftir tilkynningu og yfirvofandi umfjöllun um að hún hefði átt í ástarsambandi við 16 ára pilt þegar hún var 23 ára og eignast með honum barn fyrir 35 árum.
Logi Einarsson, ráðherra menningar- og fjölmiðlamála, segir í samtali við mbl.is að athæfið sé óboðlegt. „Mér finnst þetta ekki boðlegt háttarlag,“ segir hann. „Fjölmiðlar leika mikilvægt lýðræðishlutverk og aðhaldshlutverk í samfélaginu og við verðum að trúa að þeir vinni á hlutlægan hátt og það er ekki sæmandi að stjórnmálafólk sé að hamast á þeim,“ bætir hann við.
Ekki hægt að taka fréttir RÚV alvarlega
Mannlíf hafði samband við Birgi til að spyrja hann nánar út í málið.
„Mér fannst ömurlegheitin, lágkúran, ófagmennskan og sjálfsréttlægingin samfara fréttaflutningi um Ásthildi Lóu yfirgengileg og langt fyrir neðan þá virðingu sem þessi stofnun ætti að hafa. Sjáfsréttlætinginn þeirra, í eigin umræðuuppstiltu Silfri var sérstaklega ógeðfelld. Svona fréttamiðil er ekki hægt að taka alvarlega. Léleg slúðufréttamennska á ekki að líðast á þesssari mikilvægu stofnun og eftirleikurinn er alvarlegur áfellisdómur á stjórn og stefnu Rúv,“ sagði tónlistarmaðurinn í skriflegu svari til Mannlífs.
Er þessi afstaða þín gagnvart RÚV ný eða hefur hún tekið breytingum undanfarið?
„Mér þykir mjög vænt um Ríkisútvarpið. Víðsjá og Lestin eru stórkostlegir þættir í Íslensku útvarpi og svo hefur Doddi á Rás 2 alltaf getað fært birtu í dimma daga. Ég hlusta næstum alltaf á morgunútvarp Rásar 2 og finnst gott að komast á dýpi helstu mála þar. Stofnunin hefur alvarlega mikilvægt hlutverk í Íslenskri menningu og er því sorglegt að sjá hversu fréttaflutningur sjónvarpsins er oft lélegur, hlutdrægur og finnst mér hann hafa versnað með nýja útvarpsstjóranum. Spegillinn á Rás 1 er samt oft frábær.“
Hvaða viðbrögðum vonastu eftir frá RÚV?
„Afgreiðsludaman brosti bara og sagðist koma þessu til skila, og ég býst því fastlega við afsögnum í allri yfirmannakeðjunni sem tengist þessu máli, alveg uppí útvarpssjórann sjálfann,“ sagði Birgir að lokum.
