Lík ungs manns fannst snemma á laugardagsmorgun í Saint-Martin-síkinu í miðborg Parísar, að sögn franskra lögregluyfirvalda. Síkið hefur að undanförnu notið mikilla vinsælda meðal íbúa og ferðamanna sem hafa leitað þangað til að kæla sig niður í sumarhitum.

Slökkviliðsmenn náðu líkinu upp úr síkinu. Samkvæmt lögreglu bendir til þess að maðurinn hafi legið í vatninu í nokkra daga.

Engin skilríki fundust á manninum og hefur ekki tekist að bera kennsl á hann. Talið er að hinn látni hafi verið á aldrinum 25 til 35 ára. Rannsókn hefur verið hafin til að upplýsa dánarorsök og atvik málsins.

Yfirvöld í París heimiluðu sund í afmörkuðum hluta Saint-Martin um miðjan júní vegna mikillar hitabylgju sem gekk yfir Frakkland. Eftir að hitabylgjunni lauk hefur sund áfram verið leyft á sunnudögum undir eftirliti.

Öryggi baðgesta í síkinu hefur þó verið til umræðu og hafa yfirvöld ítrekað varað fólk við því að stökkva af brúm yfir skurðinn. Saint-Martin hefur einnig lengi verið þekkt fyrir að ýmiss konar rusli sé hent í vatnið, meðal annars rafhlaupahjólum, reiðhjólum og innkaupakerrum.

Fundurinn á líkinu bar upp á sama dag og París opnaði á ný þrjú opin sundsvæði í ánni Signu.