Gló stuðningsfélag hefur hrundið af stað söfnunarátaki til að fjármagna nýjan matsal í sumarbúðunum í Reykjadalur. Samhliða framkvæmdunum verður eldhús endurnýjað og aðstaða starfsfólks bætt.

Áætlaður heildarkostnaður verkefnisins er yfir 300 milljónir króna og byggir fjármögnunin á framlögum úr sjóðum, styrkjum og stuðningi frá almenningi og fyrirtækjum.

Núverandi aðstaða uppfyllir ekki kröfur

Matsalurinn í Reykjadal er miðpunktur starfseminnar, þar sem gestir borða saman og eiga samverustundir. Hins vegar er núverandi aðstaða orðin of lítil og aðgengi ábótavant. Sama á við um eldhús og vinnuaðstöðu starfsfólks sem þykir víða úrelt.

Þröng rými og takmarkað aðgengi valda því að ekki allir geta setið við sama borð, bókstaflega.

Til stendur að byggja um 370 fermetra viðbyggingu með rúmgóðum matsal, nútímalegu eldhúsi og bættri aðstöðu fyrir starfsfólk. Sérstök áhersla verður lögð á algilda hönnun, þannig að aðgengi verði hluti af grunnuppbyggingu mannvirkisins.

Viðbyggingin er hönnuð af Teiknistofan Stika og Birtu Fróðadóttur arkitekt, lóðarhönnun er í höndum Landslag og verkfræðihönnun hjá Ferill verkfræðistofa.

„Aðstaðan í gamla skálanum sem við nýtum sem matsal mætir hvorki þörfum gestanna né almennum kröfum um aðgengi,“ segir Hildur Helgadóttir, starfandi forstöðumaður Reykjadals í fréttatilkynningu.

„Við ætlum okkur að byggja eitthvað miklu meira en bara eitthvað hús. Við viljum byggja rými sem skapa aðstæður sem hvetja til samveru, leiks og auðvitað góðrar næringar.“

Starfsemi með langa sögu

Frá árinu 1963 hefur Gló stuðningsfélag byggt upp og rekið sumarbúðir í Reykjadal þar sem fötluð börn og ungmenni fá tækifæri til að taka þátt í leik og félagslífi á eigin forsendum. Starfsemin hefur á síðari árum stækkað og nær nú einnig til helgardvala og annarra tómstunda yfir vetrartímann.

Aðstaðan hefur hins vegar ekki fylgt þessari þróun og því er þörf á umfangsmikilli uppbyggingu.

Með söfnuninni, sem ber heitið „Sumargjöf Reykjadals“, er almenningur og fyrirtæki hvött til að leggja verkefninu lið. Markmiðið er að skapa aðgengilegt og hlýlegt umhverfi fyrir komandi kynslóðir.