Á ellefta tímanum í gærmorgun barst lögreglu tilkynning um meðvitundarlausan karlmann í heimahúsi í Kópavogi en greint er frá þessu í tilkynningu frá lögreglunni.

Hún hélt rakleiðis á vettvang samkvæmt tilkynningunni, en maðurinn, sem var um fertugt, reyndist látinn er að var komið. Ekki er ljóst með hvaða hætti andlátið bar að, en rannsókn málsins er í fullum gangi. Skýrslutökur stóðu yfir í gær og er framhaldið í dag, en enginn er í haldi vegna málsins.

Ekki er unnt að veita frekari upplýsingar að svo stöddu að sögn lögreglu.