Steve Bannon, fyrrverandi ráðgjafi Donald Trump Bandaríkjaforseta, hefur kallað eftir því að Yair Netanyahu, sonur forsætisráðherra Ísraels, Benjamin Netanyahu, verði vísað frá Bandaríkjunum og sendur á víglínuna á meðan sameiginlegar árásir Bandaríkjanna og Ísraels á Íran halda áfram, að því er erlendir fjölmiðlar greina frá.
Í viðtali á hægrisinnaða streymisveitunni „Real America’s Voice“ velti Bannon því upp hvers vegna Yair væri í fríi í Miami á meðan árásirnar stæðu yfir.
„Sonur Netanyahu er þarna í Miami, hendið honum út á morgun,“ sagði hann og hvatti bandaríska heimavarnarráðuneytið (DHS) til að grípa til aðgerða.
„Hvar er DHS þegar maður þarf á því að halda? Sendið hann til baka. Látið hann fara í búning. Setjum hann í fyrstu bylgjuna,“ bætti Bannon við.
Bannon beindi gagnrýni sinni einnig að prinsum frá arabískum Persaflóaríkjum sem eru bandamenn Bandaríkjanna og sagði að þeir ættu sömuleiðis að vera reknir úr borgum á borð við Lundúnir og sendir til að berjast á svæðinu, í ljósi þess að Bandaríkin hafa gefið til kynna að þau gætu hafið landhernað.
Hvorki Yair né bróðir hans Avner hafa lokið skylduherþjónustu í Ísrael, þrátt fyrir að vera báðir á þeim aldri.
Bannon starfaði sem háttsettur ráðgjafi á fyrsta kjörtímabili Trumps og er enn áberandi rödd innan MAGA hreyfingarinnar.
Bandaríkin og Ísrael hafa framkvæmt loftárásir á Íran frá 28. febrúar og hafa þær kostað yfir 1.340 manns lífið, þar á meðal æðsta leiðtoga landsins á þeim tíma, Ali Khamenei.
Íran hefur svarað með dróna- og eldflaugaárásum á Ísrael, Jórdaníu, Írak og Persaflóaríki þar sem bandarískar herstöðvar eru staðsettar. Árásirnar hafa valdið mannfalli og skemmdum á innviðum, auk þess að trufla alþjóðlega markaði og flugsamgöngur.
