Róbert Máni Newton hefur verið dæmdur í fangelsi af Héraðsdómi Vestfjarða.

Hann var ákærður fyrir brot gegn valdstjórninni, með því að hafa aðfaranótt sunnudagsins 3. desember 2023 fyrir utan Aðalstræti 7, við gatnamót Aðalstrætis og Mjósunds á Ísafirði og í lögreglubifreið hótað þremur lögreglumönnum líkamsmeiðingum og lífláti, og veist með ofbeldi að einum þeirra, reynt að lemja hann í andlitið og sparka í fótlegg hans og hrækt á hann, þannig að hrákinn hafnaði í andliti hans, en lögreglumennirnir voru við skyldustörf.

Róbert játaði brot sitt en hann var ekki með hreint sakarvottorð því 23. maí 2025 var hann dæmdur til að sæta fangelsi í níu mánuði fyrir líkamsárás.

Var hann því dæmdur í tíu mánaða fangelsi en dómurinn er skilorðsbundinn til tveggja ára.