Nú styttist óðum í sveitarstjórnarkosningar en þær verða haldnar næsta vor.

Mesta spennan er hjá Sjálfstæðisflokknum í Reykjavík en flokkurinn er klofinn í að minnsta kosti tvær fylkingar. Sprengju var varpað fram í gær inn í flokkinn en þá greindi Halldór Halldórsson, fyrrverandi oddviti flokksins í Reykjavík, að Hildur Björnsdóttir ætti að leiða flokkinn áfram en hún hefur verið illa séð meðal flestra annarra borgarfulltrúa flokksins.

Innanflokksmenn í flokknum segja að tímasetning á orðum Halldórs sé ekki tilviljun en þau komu stuttu eftir að tilkynnt var um að Hildur Sverrisdóttir hefði ákveðið að segja af sér sem formaður þingflokksins Sjálfstæðisflokksins og að Ólafur Adolfsson, nýr þingmaður flokksins, tæki að sér þetta stóra hlutverk en hann er dyggur stuðningsmaður Guðrúnar Hafsteinsdóttur, formanns flokksins.

Maðurinn á bakvið skipun Ólafs er sagður vera Guðlaugur Þór Þórðarson, þingmaður og fyrrverandi ráðherra, en hann fékk stuðningsmenn sína til að kjósa Guðrúnu Hafsteinsdóttur frekar en Áslaugu Örnu Sigurbjörnsdóttur. Er sú barátta sögð hafa verið framlenging á baráttu Guðlaugs við Bjarna Benediktsson, fyrrverandi formann.

Ljóst er að fólkið sem studdi Áslaugu Örnu í prófkjörinu um formannsembættið á síðasta ári er orðið hrætt um að missa borgarstjóraefni sitt úr efsta sæti borgarinnar en Hildur og Áslaug hafa stutt vel við bakið á hvor annarri.

Sagt er að Guðlaugur hafi hug á að verða næsti borgarstjóri Reykjavíkur og telja margir flokksmenn hann eina raunhæfa kostinn í stöðunni. Hann hafi mikla reynslu og hafi sýnt borginni mikla athygli á undanförnum mánuðum á meðan Hildi hefur ekki tekist að nýta mörg mistök núverandi meirihluta á neinn teljandi máta ...