Dmitry Medvedev, varaformaður öryggisráðs Rússlands og fyrrverandi forseti landsins, vísar á bug orðrómi um að stjórnvöld hyggist boða til nýrrar herkvaðningar í haust. Þetta hefur rússneska ríkisfréttastofan TASS eftir honum.
Öryggisráðið er ráðgefandi stofnun forsetans í þjóðaröryggismálum. Medvedev sagði fréttir og færslur á samfélagsmiðlum um meinta herkvaðningu vera „keyptar og greiddar“.
„Tilraunir óvinarins til að dreifa þeirri vitleysu að verið sé að undirbúa herkvaðningu í landinu eru ekkert annað en lygar og ögrun. Þetta er hluti af áróðursherferð fyrir kosningarnar. Markmiðið er augljóslega að koma á óstöðugleika,“ sagði hann.
Á fundi öryggisráðsins um nýliðun í herinn sagði Medvedev að um 200 þúsund manns hefðu gert samninga við rússneska varnarmálaráðuneytið á fyrri helmingi ársins 2026. Hann hélt því jafnframt fram að Úkraína glímdi við mannekluvanda og stæði því að baki sögusögnum um nýja herkvaðningu.
Óháði rússneski miðillinn Meduza greindi hins vegar frá því í lok júní, með vísan til heimildarmanna, að sífellt færri væru tilbúnir til að ganga til liðs við rússneska herinn á samningi. Af þeim sökum hefðu yfirvöld aukið nýliðunarherferðir og hækkað greiðslur til nýliða. Samkvæmt heimildunum eru stjórnvöld einnig sögð íhuga róttækari aðgerðir, þar á meðal nýja herkvaðningu.
Volodímír Selenskí, forseti Úkraínu, sagði nýlega að samkvæmt leyniþjónustuupplýsingum hygðist Vladímír Pútín boða til nýrrar herkvaðningar eftir kosningar til ríkisdúmunnar, neðri deildar rússneska þingsins, sem fara fram í september.
