Alexander Nord, 22 ára gamall maður, hefur verið dæmdur í lífstíðarfangelsi fyrir morðið á sænska rapparanum Gaboro sem var skotinn til bana í bílageymslu í Norrköping í desember árið 2024.
Nord var sakfelldur fyrir morð og alvarleg vopnalagabrot en hann neitaði sök. Annar maður, þrítugur að aldri, hafði verið ákærður fyrir hlutdeild í morðinu og grunaður um að hafa hvatt skotmanninn til verksins, en hann var sýknaður að fullu fyrir dómstólum.
Nafn hans á dauðalista
Samkvæmt rannsókn lögreglu hafði Gaboro farið í líkamsrækt áður en hann hélt að bifreið sinni í bílageymslu hússins. Þar beið árásarmaðurinn hans.
Í rannsóknargögnum kemur fram að nafn rapparans hafi verið á svokölluðum dauðalista sem tengdist átökum glæpagengja í Norrköping. Þar hafi staðið: „Allir á þessum lista munu deyja fyrr eða síðar.“
Gaboro var hæfður fimm skotum og féll til jarðar í bílageymslunni. Nord tók árásina upp á myndband og síðar dreifðist upptakan á samfélagsmiðlum. Á henni má heyra kvalaöskur rapparans eftir skotárásina.
Lögreglan hefur lýst morðinu sem sérstaklega miskunnarlausu.
„Öll morð eru hræðileg, en þetta morð er líklega eitt það versta sem rannsóknarteymið mitt og ég höfum nokkru sinni fengist við,“ sagði rannsóknarlögreglumaðurinn Jan Staaf áður í yfirlýsingu.
Tengdur við morðið með DNA
Samkvæmt lögreglu bauð Nord sig sjálfur fram til að framkvæma morðið í gegnum spjallhópa á netinu. Rannsakendur tengdu hann við vettvanginn með DNA-sýnum úr bílageymslunni sem síðan voru rakin með ættfræðilegri greiningu.
Engin tengsl eru sögð hafa verið milli hans og rapparans.
Í dóminum kemur fram að vitnisburður fólks nákomins Nord hafi vegið þungt. Fólkið sagðist hafa þekkt föt hans á myndskeiðinu af morðinu.
Eitt vitnið sagði einnig að Nord hefði fyrir morðið sagt að hann ætlaði að gera „eitthvað stórt“ og hefði keypt sér hanska. Eftir morðið hafi hann jafnframt sagst vera maðurinn sem sæist skjóta Gaboro í myndbandinu.
Þá hafi hann beðið viðkomandi um að segja engum frá.
Samkvæmt vitnisburði sagði Nord einnig að hann fengi hærri greiðslu ef hann tæki morðið upp á myndband. Vitni báru jafnframt að hann hefði gert grín að verknaðinum á eftir og virst stoltur af því sem hann hafði gert.
Dæmdur fyrir fleiri brot
Auk morðsins var Nord einnig dæmdur fyrir tilraun til manndráps og alvarleg vopnalagabrot vegna skotárásar á íbúðarhúsnæði í desember 2024, auk annars vopnalagabrots í mars 2025. Þá var hann einnig sakfelldur fyrir fíkniefnabrot.
Gaboro naut mikilla vinsælda í Svíþjóð, meðal annars á Spotify og TikTok, þar sem eitt laga hans sló í gegn fyrir nokkrum árum. Hann hafði einnig komið fram í sænska ríkisútvarpinu.
Rapparinn varð 23 ára gamall. Hann lést daginn fyrir 24 ára afmælið sitt.
