Varaborgarfulltrúinn og sagnfræðingurinn Stefán Pálsson greinir frá því að hann geti nú hafið blóðgjafir að nýju, þrettán árum eftir að honum var tilkynnt að hann mætti ekki lengur gefa blóð vegna lyfjanotkunar.
Stefán segir frá reynslu sinni í færslu á samfélagsmiðlum. Fyrir þrettán árum hafi hann mætt í Blóðbankann en verið vísað frá þar sem hann var byrjaður að taka lyf við háum blóðþrýstingi. Að hans sögn hafi þá verið skráð í móttökukerfið að hann mætti aldrei koma aftur.
„Það var drullusvekkjandi enda var ég mjög ánægður með töluna á blóðgjafaskírteininu mínu,“ skrifar Stefán.
Í samtali við lækni á dögunum kom hins vegar í ljós að reglunum hefði verið breytt. Stefán hafði því samband við Blóðbankann þar sem honum var staðfest að hann gæti á næstunni hafið blóðgjafir að nýju.
Stefán veltir því upp hvort fleiri séu í sambærilegri stöðu og telji sig enn óhæfa til blóðgjafar vegna eldri reglna.
Færsla hans vakti töluverð viðbrögð og lýstu nokkrir því að þeir hefðu einnig þurft að hætta að gefa blóð vegna lyfjanotkunar. Einn sagðist hafa verið kominn með 55 blóðgjafir þegar hann hóf töku blóðþrýstingslyfja og þurfti í kjölfarið að hætta.
Lögfræðingurinn Ómar Valdimarsson sagði jafnframt frá því að hann hefði lengi gefið blóð reglulega en nýlega verið meinað það vegna lyfsins Tamsulosin, sem meðal annars er notað við góðkynja stækkun blöðruhálskirtils.
Rithöfundurinn Þórunn Valdimarsdóttir sló hins vegar á létta strengi í umræðunni og skrifaði: „Varla eru blóðmerar svo glaðar að gefa blóð.“
Fleiri tóku undir með Stefáni og sögðust ætla að kanna hvort breyttar reglur þýddu að þeir gætu hafið blóðgjafir á ný.
