Biskup Íslands hefur auglýst lausar til umsóknar þrjár stöður presta í tveimur prestaköllum landsins en greint er frá þessu í tilkynningu frá Þjóðkirkjunni.

Annars vegar er um að ræða stöðu prests við Austfjarðaprestakall með aðalstarfsstöð í Djúpavogskirkju. Prestakallið nær yfir ellefu sóknir á Austurlandi þar sem um 6.000 íbúar búa.

Hins vegar eru tvær prestsstöður lausar til umsóknar í Þingeyjarprestakalli á Norðurlandi. Prestakallið þjónar níu sóknum og nær til um 4.000 íbúa.

Þingeyjarprestakall varð til árið 2022 þegar Grenjaðarstaðar-, Húsavíkur- og Skútustaðaprestaköll voru sameinuð í eitt prestakall.

Fram kemur í auglýsingu að biskup Íslands muni ráða í stöðurnar að loknu mati á gildum umsóknum. Við val á umsækjendum verður stuðst við starfsreglur kirkjuþings um ráðningar í prestsstörf sem og starfsreglur um presta.