Ríkisútvarpið leiðrétti í dag inngang að frétt sem sögð var af sambandi Ásthildar Lóu Þórsdóttur, fráfarandi mennta- og barnamálaráðherra, sem sögð var fimmtudaginn 20. mars síðastliðinn.
Í kynningu fréttarinnar sagði að Ásthildur Lóa hefði eignast barn með 15 ára barni.
„Í inngangi að umfjöllun Spegilsins, þar sem rætt var við álitsgjafa um mál Ásthildar Lóu Þórsdóttur fimmtudaginn 20. mars klukkan 18.10, kom fram sú staðhæfing að Ásthildur Lóa hefði átt barn með 15 ára pilti, þá 22 ára. Það er rangt. Hið rétta er að pilturinn var 16 ára og Ásthildur Lóa 23 ára þegar þau eignaðist barnið, eins og kom fram í fréttum RÚV af málinu. Fréttastofa RÚV harmar þessi mistök og biður alla hlutaðeigandi velvirðingar,“ sagði Freyr Gígja Gunnarsson, stjórnandi Spegilsins, í þættinum í dag.
Ríkisúvarpið hefur verið gagnrýnt harðlega vegna umfjöllunarinnar um Ásthildi Lóu. Að sögn Heiðars Arnar Sigurfinnsonar, fréttastjóra RÚV, var ekki talin ástæða til að leiðrétta efnisatriði, enda væru heimildir að baki.
RÚV stendur við annað
Í frétt RÚV fimmutdaginn í síðustu viku var Ásthildur Lóa meðal annars sökuð um að hafa „tálmað umgengni“ og var vitnað til laga- og refsiákvæða sem áttu ekki við um lögræðisaldur. Að auki sagði Ríkisútvarpið að Ásthildur Lóa hefði „leitt unglingastarf“. Þessu hefur hún hafnað, en Ríkisútvarpið byggði umfjöllun sína á barnsföður hennar og hefur ekki talið ástæðu til frekari leiðréttinga. Þá sagði RÚV að „trúnaðarupplýsingar [hefðu] borist til ráðherra“ og var fullyrt að starfsmenn ráðuneytisins hefðu „fullvissað sendanda um að öll erindi væru trúnaðarmál“. Síðar kom í ljós að sendandi erindisins hafði boðið fram að Ásthildur Lóa yrði viðstödd fund hennar með forsætisráðherra um málið, en boðaði að hún lyki afskiptum af því ef Ásthildur Lóa viki úr embætti ráðherra, sem hún gerði áður en frétt RÚV var birt.
Byggðu fréttina á annarri hliðinni
Í grein Heiðars Arnar Sigurfinnssonar, fréttastjóra RÚV, undir titlinum Lýðræðið deyr í myrkrinu, svaraði hann gagnrýni með því að Ásthildur Lóa hefði sjálf ákveðið að segja af sér og að reynt hefði verið að hafa samband við hana. „Fréttastofa RÚV byggði fyrstu frétt sína á viðtölum við barnsföður Ásthildar Lóu og fyrrverandi tengdamóður hans, sem hafði sent forsætisráðuneytinu erindi um málið,“ segir hann.
