Myndskeið sem náðist á öryggismyndavél hefur vakið mikla athygli á samfélagsmiðlum eftir að sendiferðarbílstjóri hjá flutningafyrirtækinu UPS sést kasta pakka í hund við afhendingu og í kjölfarið ögra eiganda dýrsins til slagsmála.

Atvikið átti sér stað á þriðjudag og náðist á Ring-öryggismyndavél við íbúðarhús. Á myndskeiðinu sést bílstjórinn kasta stórum pakka af afli í átt að hundi sem stóð við heimilið. Pakkinn hæfir hundinn í andlitið áður en bílstjórinn snýr sér við og gengur á brott.

Skömmu síðar kemur eigandi hundsins til að ræða við bílstjórann. Þá sést starfsmaðurinn kasta frá sér húfu og gleraugum, setja upp hnefana og skora eigandann á hólm. Hávær orðaskipti eiga sér stað en ekkert bendir til þess að til líkamlegra átaka hafi komið.

Myndbandið hefur farið hratt í dreifingu á samfélagsmiðlum og vakið hörð viðbrögð þar sem margir gagnrýna framkomu bílstjórans gagnvart bæði dýrinu og eiganda þess.

UPS staðfesti í yfirlýsingu að fyrirtækið væri meðvitað um atvikið og hefði brugðist við.

„Við erum meðvituð um myndbandið. Við höfum gripið til viðeigandi aðgerða gagnvart bílstjóranum og einnig haft samband við viðskiptavin okkar,“ sagði fyrirtækið í yfirlýsingu.

UPS hefur ekki upplýst hvaða agaviðurlögum hafi verið beitt né hvort bílstjórinn verði áfram við störf. Þá hefur fyrirtækið heldur ekki greint frá því hvernig það hyggst bæta eiganda hundsins atvikið.

Ekki liggur fyrir hvort hundurinn hafi hlotið meiðsli af högginu.