Sjaldan hafa spjótin staðið jafnrækilega að einum embættismanni eins og Sigríði Björk Guðjónsdóttur ríkislögreglustjóra. Hún hefur reynt að standa af sér storminn, en nú er von á því sem gæti endanlega gert útslagið. Á næstunni kemur könnun frá Gallup, þar sem spurt er út í traust almennings til ríkislögreglustjóra og svo spurt hvort hún eigi að segja af sér embætti. Verði dómur þjóðarinnar að hún eigi að segja af sér embætti er torséð hvernig hún heldur áfram störfum.

Það sem helst hjálpar Sigríði Björk er að kostnaðurinn við að segja upp slíkum embættismanni er gríðarlegur og réttindi opinberra starfsmanna alræmd. Forveri hennar, Haraldur Johannessen, kostaði á sínum tíma 56,7 milljónir króna í starfslokagreiðslur, sem er 79 milljónir króna á verðlagi dagsins í dag, en ferill Haraldar hjá embættinu var síst skárri en mistökin sem Sigríður Björk hefur játað á sig.

Það sem vinnur gegn Sigríði Björk er meðal annars að meðal þingmanna í flokki Þorbjargar Sigríðar Gunnlaugsdóttur dómsmálaráðherra sem fer með mál hennar er Grímur Grímsson, fyrrverandi yfirlögregluþjónn, sem laut í lægra haldi fyrir Sigríði Björk í ráðningu í stöðuna árið 2020. Grímur á lengri baksögu með Sigríði Björk, en hann var ráðinn yfir miðlæga rannsóknardeild lögreglunnar á höfuðborgarsvæðinu árið 2016 eftir hreinsanir Sigríðar Bjarkar og eineltisásakanir gegn henni.