Í dagbók lögreglu frá því í nótt er greint frá því að ökumaður hafi verið stöðvaður í akstri grunaður um akstur undir áhrifum fíkniefna. Hann var látinn laus eftir hefðbundið ferli.

Aðili var handtekinn þar sem hann hafði brotið rúðu á skemmtistað. Ekki reyndist nauðsynlegt að vista aðilann í fangaklefa og var hægt að klára málið með vettvangsskýrslu.

Tilkynnt var um hópslagsmál við bar í hverfinu. Þar áttu menn að hafa slegist með hnífum. Þegar lögregla kom á staðinn var tilkynningin líklega ekki á rökum reist en einn aðili var þó kærður fyrir vopnalagabrot.

Lögregla var kölluð til vegna ofurölvi ferðamanns. Ekki náðist neitt samband við ferðamanninn um hvar viðkomandi væri að gista og fékk hann því gistingu í fangageymslu þangað til hann getur komið sér heim á hótel.

Tilkynnt var um líkamsárás en þar höfðu nokkrir menn ráðist á tvo sem voru á göngu. Málið er í rannsókn.