Innanhússhönnuðurinn og stofnandi og ritstýra islanders.is, Auður Gná Ingvarsdóttir, hefur sett íbúð sína á Baldursgötu 30 í Reykjavík á sölu.
Íbúðin er 88 fermetrar og ásett verð er 52,5 milljónir króna. Íbúðin var öll tekin í gegn árið 2015 en hún er búin einu svefnherbergi og einu baðherbergi.
Auður er annáluð smekkmanneskja og því íbúðin öll hin glæsilegasta en henni fylgja einnig svalir með góðu útsýni, og gómsætri lykt eins og Auður segir sjálf í Facebook-færslu þar sem hún vekur athygli á fyrirhugaðri sölu.
„Beint fyrir utan gluggann er að finna áræðanlegustu eldhúsklukku í allri Reykjavík í turni Hallgrímskirkju, og því ekki ástæða til að ofsjóða pasta, grænmeti eða annan mat. Auk þess er Eldsmiðjan á næsta horni og Snaps á því þar næsta, þannig að ef maður er ekki mikið fyrir að elda, þá er ekki hætta á að svelta. Úrvals útsýni til norðurs og suðurs. Á góðum sumardögum koma svalirnar að góðum notum, algjör stilla og oft á tíðum magnaður ilmur af eldbökuðum pizzum,“ skrifar Auður og bætir einnig við að opið hús sé í eigninni á morgun, 10. apríl, frá 17.15 til 17.45.
„Mín opna, bjarta og skemmtilega óhefðbunda íbúð er í sölu og á morgun er hægt að koma við og skoða. Ef að einhver veit um einverja opna, bjarta og óhefðbunda einstaklinga sem hefðu áhuga á að búa á besta stað í Þingholtunum, þá væri tilvalið að láta vita af Baldursgötunni.“
Þetta er ekki í fyrsta sinn sem Auður setur íbúðina á sölu, en samkvæmt frétt Smartlands í apríl í fyrra, fyrir næstum því sléttu ári, var íbúðin þá á markaðinum.
Athugasemdir