Bakaði til að hafa stjórn á erfiðum aðstæðum

Tobba segir fjöl­skyld­una vera eins og ítalska mafíu­fjöl­skyldu, þau borði saman að minnsta kosti einu sinni í viku, hún tali við báða for­eldra sína í síma oft á dag. Og stundum viti hún ekki einu sinni hvort hún sé í sínum eigin fötum eða fötum af móður sinni.
„Ég er einmitt að horfa á fata­hengið hérna,“ segir hún og hlær. „Við mamma eigum eins úlpur og eins skó og það er bara happa og glappa hvort ég tek réttan fatnað þegar ég kem og fer. Kannski á eftir að klippa á nafla­streng­inn, ég veit það ekki, en þetta eru gríð­ar­leg for­rétt­indi.“

Tobba hefur haldið þeirri ímynd út á við að hún sé hressa stelpan og gleði­gjaf­inn, er það hennar hlut­verk innan fjöl­skyld­unnar?
„Nei, nei,“ segir hún og hlær aftur. „Pabbi minn er svona líka. For­eldrar mínir eru alveg ótrú­lega skemmti­legir og ég er alin upp við mikið líf og fjör og grín. Það hefur aldrei verið leið­in­legt heima hjá mér og ég er alin upp við það að reyna að hafa skemmti­legt í kringum okkur, að maður sé ekki skemmti­legur nema maður geti gert grín að sjálfum sér. Það sem ég sakna mest í þjóð­fé­lag­inu í dag er ein­lægni. Heima hjá mér segir maður frá því þegar manni líður illa og er ekk­ert að þykj­ast. Mér finnst oft erfitt og nið­ur­drep­andi þegar fólk lætur líta svo út að það sé aldrei neitt að. Allt á að lúkka svo geggjað vel. Þegar ég missti systur mína og átti mína erf­ið­ustu daga, veit ég stundum ekki hvernig ég dró and­ann, þá bak­aði ég allan sól­ar­hring­inn. Og eftir því sem mér leið verr varð smjör­kremið hærra og á end­anum urðu þetta hálf­gerðir skúlp­t­úrar. Þetta var alveg galið, en þá var ég bara að reyna að hafa stjórn á ein­hverju, gera eitt­hvað sem ég réði við og gat klárað og það gekk upp. En ég við­ur­kenndi það alveg, þegar ég póstaði ein­hverri mynd á Facebook sagði ég bara „nú er mjög erfitt, nú baka ég mikið“ í stað­inn fyrir að fá ein­hver óeðli­leg læk eða gleði út á þetta. Auðvitað gerum við þetta öll, við erum ekk­ert alltaf að segja öllum allt. Stundum segir maður bara að allt gangi vel, en mér finnst mik­il­vægt að geta líka sagt „nei, veistu, það gengur bara ekki vel núna“.“

Lestu við­talið við Tobbu í heild sinni.