Býr sig undir það versta

Kjara­við­ræður Blaða­manna­fé­lags Íslands (BÍ) og Sam­taka at­vinnu­lífs­ins (SA) halda áfram í dag hjá rík­is­sátt­semj­ara en að öllu óbreyttu verður vinnu­stöðvun á morgun á milli klukkan 10:00 og 22:00 hjá blaða­mönnum og ljós­mynd­urum á mbl.is, fretta­bla­did.is, ruv.is og visir.is.

Í sam­tali við mbl.is seg­ist Hjálmar Jónsson, for­maður BÍ, búa sig undir það versta. „Miðað við hvað þetta hef­ur gengið ótrú­lega illa hingað til og miklu verr en ég hefði trúað þá vona ég það besta og bý mig und­ir það versta,“ er haft eftir Hjálmari.

Hann segir að bæði BÍ og SA hafa það þó að mark­miði að reyna að forða því að það verði vinnu­stöðvun á morgun.

Hjálmar hefur tjáð sig um að það sé honum óskilj­an­legt hvernig SA hefur staðið að samn­inga­við­ræðum við BÍ. „Við blaða­menn njótum hins vegar ekki þeirra for­rétt­inda að að fá nokkra vit­ræna umræðu um kjör okkar og vinnu­fyr­ir­komu­lag og hvað betur má fara, þó við séum komnnir á brún verk­fallsá­taka í fyrsta skipti í rúm 40 ár. Það er miður og í raun óskilj­an­legt að Samtökum atvinnu­lífs­ins skuli hafa verið leyft að  standa jafn illa að málum í þessum efnum og raun ber vitni síð­ustu átta mán­uði,“ var haft eftir honum í grein sem birt­ist á vef BÍ fyrr í nóv­em­ber.