Góð vika – Áslaug Arna Sigurbjörnsdóttir
Nýr dómsmálaráðherra tók við lyklavöldum í ráðuneytinu sl. föstudag en tilkynningar um ráðherraefnið var beðið með nokkurri eftirvæntingu. Embættið hreppti að lokum Áslaug Arna Sigurbjörnsdóttir, þingmaður og ritari Sjálfstæðisflokksins, sem er yngst kvenna til að hafa setið á íslenskum ráðherrastóli.
Margir tóku fréttunum vel og sagði Steingrímur J. Sigfússon, forseti Alþingis, m.a. ánægjulegt að sjá ungar konur hefjast til forystustarfa á meðan enn hallaði á þeirra hlut. Bjarni Benediktsson, formaður Sjálfstæðisflokksins og fjármálaráðherra, sagði Áslaugu Örnu einn efnilegasta stjórnmálamann landsins, sem hefði komið „af miklum krafti inn í þingið og stýrt af öryggi og festu stórri þingnefnd“, þ.e. utanríkismálanefnd. Fær hún nú aldeilis tækifæri til að sanna sig en hennar bíða gríðarstór verkefni. Sagðist Áslaug Arna myndu nálgast þau af auðmýkt.
Slæm vika – Ragnar Önundarson
Það fór vart fram hjá neinum að margir áttu bágt eftir að tilkynnt var um nýjan dómsmálaráðherra. Þar fóru fremstir í flokki „skopmyndateiknari“ Morgunblaðsins og Ragnar Önundarson, sem hefur löngum verið sérstakur áhugamaður um Áslaugu Örnu Sigurbjörnsdóttur, nýskipaðan ráðherra.
Margir muna eftir því þegar hann deildi mynd af þingkonunni á Facebook þar sem hún var með blautt hárið en hann hefur einnig kallað hana „sætan krakka“ og viðrað áhyggjur sínar af kynhormónabúskap ráðherrans. Í vikunni sakaði Ragnar svo Áslaugu Örnu um „forréttindablindu“, þar sem hún hefði þegið „frama og völd sem stendur öðrum nær að fá.“ Af skrifum Ragnars er ljóst að hann hefur verulegar áhyggjur af framtíð Áslaugar Örnu í stjórnmálum en það væri ef til vill þeim báðum fyrir bestu að hann fyndi sér nýtt áhugamál.
Athugasemdir