George R. R. Martin notar einangrunina til að vinna við The Winds of Winter

Rit­höf­und­ur­inn George R. R. Martin, höf­undur bókanna sem Game of Thrones-þætt­irnir byggja á, til­kynnir aðdá­endum á heima­síðu sinni að hann hafi ein­angrað sig vegna kór­óna­veirunnar COVID-19 þar sem hann sé sann­ar­lega meðal þeirra sem eru í mestri hættu vegna ald­urs og lík­am­legs ástands, en full­vissar þá um að honum líði vel og hann vinni dag­lega að skriftum.

„Satt best að segja ver ég meiri tíma í Westeros en í hinum raun­veru­lega heimi og skrifa á hverjum degi,“ segir hann í færsl­unni á heima­síð­unni. „Ástandið er ansi slæmt í kon­ungs­ríkj­unum sjö … en kannski ekki eins slæmt og það getur orðið hér.“

Fimmta bókin í bóka­flokknum, Dansað við dreka, kom út árið 2011 og aðdá­endur því orðnir ansi þreyttir á að bíða eftir þeirri sjöttu, Vetr­ar­vindum, sem hefur tekið Martin tíu ár að skrifa og enn sér ekki fyrir end­ann á bið­inni. Hann er þó hinn kok­hraustasti og bendir á að lestur sé besta leiðin til að fá tím­ann til að líða á meðan beðið er eftir að far­ald­ur­inn gangi yfir.

„Við lifum nú furðu­lega daga,“ segir Martin. „Eins ævaforn og ég nú er þá man ég ekki eftir að hafa upp­lifað neitt í lík­ingu við síð­ustu vikur. Stundum þegar ég horfi á frétt­irnar get ég ekki varist því að finn­ast við öll búa í vís­inda­skáld­sögu núna. En því miður ekki þeirri teg­und af vís­inda­skáld­sögu sem mig dreymdi um að búa í þegar ég var strákur.“