Styðjum hvor aðra – „Í hreinskilni sagt þá þorðum við varla að vona að við kæmumst áfram“

„Við þekkt­umst ekk­ert áður en Birgir [Stef­áns­son, innsk. blaða­manns] og Ragnar [Már Jónsson] fengu okkur til að koma með sér í þetta,“ segir Helga og Ísold við­ur­kennir að það hafi verið svo­lítið stressandi í upp­hafi að fara út í svona stórt verk­efni með ein­hverjum sem hún þekkti ekk­ert og hafi ekki unnið með áður. „En um leið og við hitt­umst féllum við saman eins og flís við rass,“ tekur hún fram. „Við gerðum strax sam­komu­lag um að styðja og hvetja hvor aðra áfram og vera alltaf hrein­skilnar. Í dag er ég virki­lega þakk­lát fyrir að hafa hana með mér í þessu ferli.“

Þegar for­vitn­ast er um tón­list­ar­legan bak­grunn þeirra, kemur í ljós að þær eru alveg hvor úr sinni átt­inni. „Ég er útskrifuð djass­söng­kona úr Tón­list­ar­skóla FÍH og fór í Complete Vocal Technique-nám í Kaup­manna­höfn og hef verið að semja og gefa út mína eigin tón­list; fyrsta lagið mitt kom á Spotify árið 2018 og heitir Midnight Sun. Fólk gæti munað eftir mér úr The Voice Ísland þar sem ég komst í und­an­úr­slit fyrir þremur árum og svo hef ég komið mikið fram með bróður mínum, Má Gunn­ars­syni,“ telur Ísold upp og getur þess að þau systk­inin eigi einmitt sig­ur­lagið úr Jóla­laga­keppni Rásar 2 árið 2019.

Ísold Wilberg Ant­ons­dóttir og Helga Ingi­björg Guð­jóns­dóttir flytja lagið Meet me halfway sem keppir til úrslita í Söngvakeppn­inni 29. febr­úar.

Helga seg­ist hafa verið syngj­andi alveg frá níu ára aldri, þótt hún sé ekki menntuð söng­kona. „Ég vann Söng­keppni fram­halds­skól­anna árið 2006 og gekk svo til liðs við Flug­freyjukór Icelandair undir stjórn Magnúsar Kjart­ans­sonar 2017. Þar lærði ég mikið á því að syngja í hóp og öðl­að­ist sjálfs­traust til að syngja ein.“

Spurðar hvernig Birgir og Ragnar hafi fengið þær til að taka þátt í Söngvakeppn­inni segir Ísold að það hafi nú ekki þurft mikið til. „Mig hefur alltaf dreymt um að taka þátt í Eurovision, ég elska glam­úr­inn og glimmerið þannig að það þurfti alls ekki að sann­færa mig um að vera með. Sér­stak­lega ekki eftir að ég heyrði lagið,“ segir hún og bætir við að hún hafi verið með það á heil­anum í viku eftir að hún heyrði demóið fyrst.

Helga bendir á að Ísold hafa síðan sungið demó-útgáf­una sem strák­arnir sendu inn í keppn­ina. Hálfgerð til­viljun hafi ráðið því að hún sjálf var síðan fengin til að syngja á móti Ísold í keppn­inni. „Strák­arnir heyrðu mig syngja í partíi, þar sem Ingó veð­urguð var að skemmta. Hann tók þar m.a. lagið Shallow úr A Star is Born og óskaði eftir stelpu sem gæti sungið á móti honum og vin­konur mínar ýttu mér þá upp á svið. Þannig heyrðu strák­arnir mig syngja og nokkrum dögum seinna buðu þeir mér að taka þátt í atrið­inu,“ segir hún og bætir við að keppnin hafi verið ótrú­lega skemmti­leg og lær­dóms­rík en þetta líði allt of hratt.

Áttu þær von á að kom­ast í úrslit? „Í hrein­skilni sagt þá þorðum við varla að vona að við kæm­umst áfram, af því að keppnin í ár er ein sú besta sem ég man eftir og við erum báðar ný nöfn í brans­anum,“ játar Ísold. „Það var samt alltaf mark­miðið að kom­ast í úrslit og bara það að kom­ast þangað er mik­ill sigur út af fyrir sig, við erum svo þakk­látar öllum þeim sem höfðu trú á okkur og kusu okkur áfram.“

Ætlið þið að halda áfram sem dúó eftir að þessu öllu er lokið? „Ég er í raun­inni ekki farin að hugsa svo langt,“ svarar Helga. „Það er svo mikið í gangi að maður hugsar í raun­inni ekk­ert lengra en til 29. febr­úar.“

Talandi um það, nú eru úrslitin á morgun, við hverju má fólk búast? „Það sem ein­kennir þessa keppni, að mínu mati, er hversu fjöl­breytt lögin eru og atriðin öll svo ein­stök á sinn hátt,“ svarar Ísold. „Sam­keppnin í ár er hörð og það eru margir ótrú­lega flottir flytj­endur sem taka þátt en svo veit maður aldrei hvað ger­ist af því að það er alltaf ein­hver sem gæti komið skemmti­lega á óvart.“