Sjónvarpsframleiðandi tvísaga um fjárveitingu frá Samherja

Samherji hefur birt stiklu með upp­tökum af Helga Seljan frétta­manni og er þar um að ræða brot úr Sam­herja­þáttum sem sýndir verða um meinta mútu­starf­semi fyr­ir­tæks­ins við Afr­íku­veiðar. Áður hafa verið gerðir sjón­varps­þættir um fyr­ir­tækið þar sem fjallað var um hús­leit Seðla­banka Íslands hjá því og voru þeir þættir sýndir á sjón­varps­stöð­inni Hring­braut. Sigurður Kristinn Kol­beins­son sá um þá þætti fyrir sjón­varps­stöð­ina og hann vís­aði því á bug í sam­tali við Mannlíf að hafa verið feng­inn til verks­ins af Samherja eða að hafa fengið greitt fyrir gerð þátt­anna frá fyr­ir­tæk­inu. Aðspurður sagð­ist hann ekki koma nálægt gerð hinna nýju þátta.

„Nei, nei, nei. Það er langt síðan ég gerði þessa þætti og þeir hafa ekk­ert með þessi mál að gera. Ég kem ekki nálægt því. Ég var ekki feng­inn til verks­ins og þeir áttu ekki hug­mynd­ina að þeim. Ég fram­leiddi þetta sjálfur fyrir Hring­braut. Því fer fjarri að ég hafi verið feng­inn til þess eða fengið greitt fyrir frá Samherja, ekk­ert svo­leiðis,“ sagði Sigurður Kristinn í sam­tali við Mannlíf.

Sjá hér: Samherji greiddi ekki fyrir sjón­varps­þátt á Hring­braut. 

Þessar full­yrð­ingar stang­ast aftur á móti á við fyrri til­svör Sigurðar Kristins, þá í sam­tali við Stundina. Þar kemur fram að Samherji borg­aði og stýrði efn­isvali að hluta til vegna gerð þátt­anna og virð­ist Sigurður Kristinn ganga við því að þættir Hring­brautar um meint gjaldreyr­is­brot Samherja hafi verið kostuð af útgerð­ar­fyr­ir­tæk­inu að ein­hverju leyti. Mál Seðala­banka Íslands gegn Samherja var á end­anum látið niður falla. „Samherji kost­aði þann þátt að lang­mestu leyti. Í þeim þætti var meira að segja kannski svo­lítið langt gengið þar sem birt var sam­tal Þor­steins Más Bald­vins­sonar við Má Guð­munds­son seðla­banka­stjóra án þess að hann vissi af því. Hann við­ur­kenndi það þegar við vorum að vinna þátt­inn að þetta væri brot á reglum en hann ákvað að taka á sig alla ábyrgð og skaða jafn­vel þó Hring­braut hefði þurft að lúta í lægri haldi ef þetta hefði orðið eitt­hvað,“ sagði Sigurður Kristinn.

Mannlíf sló aftur á þráð­inn til Sigurðar Kristins í dag til að bera það undir hann hvor útgáfan sé sú rétta varð­andi styrkt­arfé frá Samherja. Samtalið var á þess leið:

Blaða­maður: Sæll Sigurður, Trausti heiti ég, blaða­maður Mannlífs á nýjan leik. 

Sigurður: Já bless­aður.

Blaða­maður: Fyr­ir­gefðu ónæðið. 

Sigurður: Ég er dáldið mikið upp­tek­inn Trausti, ég er að reyna að reka fyr­ir­tæki hérna. Var ég ekki búinn að svara þér öllu um þetta mál? 

Blaða­maður: Ég þarf bara að spyrja þig að einu. Eftir að við töl­uðum saman fór ég aðeins að grúska og fann hérna umfjöllun um þessa þætti, eldri umfjöllun. Þar sem þú ert kvót­aður um að Samherji hafi borgað þessa þætti að mestu leiti? 

Sigurður: Já, nei, það er eld­gam­alt mál og teng­ist Hring­braut. Ég ætla ekk­ert að tjá mig um það. Þeir voru ekk­ert að borga mér neitt, það er ekk­ert svo­leiðis. Ég er búinn að fá alveg nóg af þessu máli. Það kemur ekk­ert því við sem þú ert að skrifa um útaf ein­hverjum þætti sem er verið að sýna á RÚV á morgun. Ég er búinn að kynna mér þetta, hringdi niður á Hring­braut, en þetta er ein­hver þáttur sem þeir hafa fram­leitt sjálfir og RÚV er að sýna. 

Blaða­maður: Algjör­lega. Enda er ég ekk­ert að tengja þig við þá þætti. Fréttin er hins vegar um það hvort þeir hafi greitt fyrir fyrri þætti. 

Sigurður: Ekkert svo­leiðis. Ég vil ekk­ert ræða þetta mál frekar. 

Blaða­maður: Þú sagðir við mig fyrr í dag að þú hefðir ekk­ert fengið greitt en svo sé ég kvót í þig þar sem þú segir að Samherji hafi greitt fyrir þessa fram­leiðslu. 

Sigurður: Það var blaða­maður sem var alveg útúr korti og rang­túlk­aði það sem ég hafði sagt og það var ekki hægt að leið­rétta þetta. Ég fékk miklar skammir fyrir þetta því þetta kom svo ansa­lega útúr mér. 

Blaða­maður: Reyndir þú að lag­færa þetta? 

Sigurður: Þú mátt ekki hafa neitt eftir mér í því. Þú ert ekki að eiga neitt við­tal við mig, það er á hreinu. 

Blaða­maður: En ég þarf nátt­úr­lega að bera þetta undir þig. 

Sigurður: Já. Heyrðu, ég ætla að slíta sam­tal­inu. 

Og með því lauk sam­tal­inu.

Þess bera að geta geta að Fjöl­miðla­nefnd tók þetta mál og aðra dag­skrár­gerð Hring­brautar til umfjöll­unar og sektaði sjón­varps­stöð­ina um alls tvær millj­ónir króna í fjórum aðskildum ákvörð­unum. Komst hún að þeirri nið­ur­stöðu að kostandi þátt­anna, Samherji hf., hafi haft áhrif á inni­hald og efn­is­tök hins kost­aða frétta­tengda efnis og að um hafi verið að ræða ein­hliða umfjöllun sem ekki hafi verið í sam­ræmi við hlut­lægni­kröfur laga um fjöl­miðla.

Eins og áður sagði verður á morgun sýndur fyrsti þáttur Sam­herja­þátta sem taka munu á ásök­unum um mútur við veiðar í Afríku. Heim­ildir Mannlífs herma að eitt af meg­in­mark­miðum þátt­anna sé að afhjúpa Helga Selja frétta­mann og var Þorbirni Þórð­ar­syni, fyrrum frétta­manni Stöðvar 2, falið það verk­efni. Frétta­mað­ur­inn fyrr­ver­andi er í hópi þeirra að­ila sem veita Sam­herja að­stoð í kjöl­far upp­ljóstr­ana um meintar mútu­greiðsl­ur í Namib­íu.