Mamma Nadíu húðskammar landsmenn: „Er nauðsynlegt að rústa mannorði ungra stúlkna?“

Bryndís Líndal, móðir Nadíu Sif Líndal Gunn­ar­dóttur, segir lands­mönnum til synd­anna á Facebook. Nadía er önnur tveggja íslenskra kvenna sem heim­sóttu ensku lands­liðs­menn­ina Phil Foden og Mason Greenwood á Hótel Sögu. Bryndís segir að almenn­ingur tali skelfi­lega um stelp­urnar tvær.

„Er þetta ekki komið gott? Er nauð­syn­legt að rústa mann­orði ungra stúlkna fyrir ekki stærra atvik en þetta? Gerið þið ykkur grein fyrir því að það eru ungar sálir á bak­við þessi nöfn?  Hver hefur ekki verið tví­tugur og gert eitt­hvað sem hann hefði betur mátt sleppa? Hversu margar ungar stelpur myndu vilja hitta mynd­ar­legan frægan strák? eða snúum þessu við, hversu margir strákar myndu vilja hitta mynd­ar­lega fræga stelpu? Hefðu þeir verið kall­aðir öllum illum nöfnum á kommenta­kerf­unum, hefðu þeir verið kall­aðir hórur eða vænd­is­menn? ég held ekki,“ segir Bryndís.

Hún biður bæði frétta­miðla og þá sem skrifa athuga­semdir að fara var­lega. „Frétta­miðlar, þið megið stoppa núna, þið eruð búin að koma ykkar á fram­færi og vel rúm­lega það. Að lesa kommentin hjá öllu þessu full­orðna fólki er til hábor­innar skammar, hvernig má þetta bara við­gang­ast. Svo erum við hissa á að börn hér á landi leggi önnur börn í ein­elti, ég er bara ekk­ert hissa á því lengur ef börnin eiga svona for­eldra sem láta svona við­bjóð útúr sér um ungar venju­legar stelpur,“ segir Bryndís.

Þeir brutu reglur

Bryndís segir fárán­legt að ætl­ast til þess að allir eigi að vita hver er sé í sótt­kví eða ekki. „Gleymum því ekki að þær voru ekki í sótt­kví, sá sem er í sótt­kví er ábyrgur. Það er ansi mikil ábyrgð lögð á okkur hér á landi ef að við eigum að hafa á hreinu nöfn allra á land­inu sem sæta sótt­kví. Ég eins og dóttir mín fylgist ekk­ert með fót­bolta, ég hef bara engan áhuga á honum. Svo ég var ekki að fylgj­ast með þeim frétta­flutn­ingi um enska lands­liðið og hvaða reglum þeir gengdu til þess að fá að koma og spila hérna, afh ætti hún þá að vita það eitt­hvað frekar,“ segir Bryndís og heldur áfram:

„Hér á landi eru þær teknar og jarð­aðar því að ÞEIR brutu reglur um sótt­kví. Í Bret­landi eru þær teknar og jarð­aðar fyrir það að láta þetta leka í blöðin. Nadía tók engar myndir þetta umrædda kvöld og á engan þátt í því að þetta lak í blöðin, svo hún var ekki að leita eftir athygli.“

Skammar landsmenn

Hún segir Nadíu alna upp af alúð. „Nadía Sif er alin upp í mik­illri ást og alúð, alin upp við það að tala ekki illa um náung­ann, hún má ekk­ert aumt sjá. Hún er alltaf fyrst til að hjálpa þeim sem að líða illa og á hún marga vini sem leita til hennar ef þeim líður illa. Hún er sterk og með bein í nef­inu og þakka ég guði fyrir það í dag því að það eru ekki allar ungar stúlkur sem að myndu höndla svona illa með­ferð. Auðvita líður henni hræði­lega illa yfir öllum þessum skít sem hún er að fá yfir sig. Það er ekki hægt annað en að taka þetta inn á sig. En hún veit réttu sög­una, hún veit betur og við fjöl­skyldan vitum betur,“ segir Bryndís.

Hún biðlar til lands­manna að hætta að úthúða ungar stúlkur: „Reynum nú kæru lands­menn að finna eitt­hvað skemmti­legra að fjalla um áður en að þessar ungu sálir brotni illa undan þessu öllu. Virð­inga­fyllst, móðir sem elskar barnið sitt útaf líf­inu og finnst barnið sitt alltaf flott­ast og best þó það stígi feil­spor í líf­inu.“