Björgólfur Thor með Covid-19 og sér fram á tækifæri

Björgólfur Thor Björgólfs­son fjárfestir veikt­ist af Covid-19. Ekki bara hann heldur öll fjöl­skylda hans en þau eru búsett í Lundúnum.

Frá þessu greinir Björn Ingi Hrafns­son, rit­stjóri Viljans, þegar hann aug­lýsir bók sína Vörn gegn veitu. Í umfjöll­un­inni ræðir Björgólfur Thor um tæki­færin sem hann sér í breyttum heimi eftir Covid-19. Hann telur efna­meiri ferða­menn koma til með að ferð­ast til Íslands eftir far­ald­ur­inn sem skilji meira eftir í hag­kerf­inu heldur en massa­t­úrism­inn sem var hér áður.

Björn Ingi

Hér kemur skoðun Björg­ólfs Thors í heild sinni sem birt­ist í bók Björns Inga:

„Í stuttu máli má segja að Ísland hafi notið vin­sælda um allan heim vegna óspilltrar náttúru og ann­arra gæða svo sem hreins vatns og lítillar meng­unar. Í breyttum heimi eftir COVID-19 mun sú sérstaða aðeins verða dýrmæt­ari. Athygl­is­vert er að hafa í huga að náttúruham­farir hafa áður leitt til langtímaávinn­ings hjá okkur enda þótt þær hafi haft í för með sér skamm­vinnan skell. Gott dæmi um það er gosið í Eyja­fjallajökli þegar túrista­gos á íslenskan mæli­kvarða lam­aði allar flug­samgöngur í hálfan mánuð milli tveggja heimsálfa, Evrópu og Ameríku. Land­kynn­ingin sem Ísland fékk í kjölfarið var ómet­an­leg og átti sinn þátt í þeirri gríðar­legu þenslu sem varð í ferða­mennsku hér á landi á næstu árum. Nú þarf að huga að því með okkar besta fólki hvernig hægt er að end­ur­taka þann leik svo að Ísland komi öflugra út eftir far­aldur kórónaveirunnar.

Það er vel hægt. Lands­lagið í ferða­mennsku mun breyt­ast í heim­inum og ekki síst á Íslandi. Færri ferða­menn munu sækja landið heim, en þeir sem það gera munu eyða meira hér og skilja meira eftir sig í hag­kerf­inu. Þetta verða sem sagt efna­meiri ein­stak­lingar með meira ráðstöfun­arfé sem gera auknar kröfur um gæði og öryggi. Slíkt er líklega gott með til­liti til smæðar þjóðar­innar og þeirrar sérstöðu sem við viljum varð­veita eftir bestu getu.

Það getur ekki verið mark­mið okkar að laða að massatúrisma, milljónir ferða­manna sem koma hingað með lággjalda­flugfélögum og skilja lítið eftir sig. Með öðrum orðum: Þetta verður frekar spurn­ing um gæði en magn og ætti að leiða til þess að fram­leiðni í ferða­þjónustu sem atvinnu­grein gæti auk­ist enda þótt ferðamönnum fækki. Það er áhuga­verð staða og felur í sér gríðar­leg tæki­færi.“