Sólveig Anna: „Nú kemur í ljós að móðir mín var auðkýfingur“

Sólveig Anna Jóns­dóttir, for­maður Eflingar, er kald­hæðin í pistli sem hún birtir á Facebook. Þar gerir hún grín af Við­skipta­blað­inu sem virð­ist halda því fram að fólk sem eigi íbúð skuld­laust í blokk séu hinir sönnu auð­kýf­ingar Íslands.

„Við­skipta­blaðið er búið að reikna þetta fyrir okkur: Það eru mamma þín og pabbi í blokk­inni sem eru rík­asta fólkið á Íslandi! Þannig að vilj­iði gjöra svo vel að hætta þessu væli og byrja sam­stundis að gleðj­ast yfir því að eiga millj­óna­mær­inga fyrir for­eldra,“ skrifar Sólveig og heldur áfram:

„Nú eru báðir for­eldrar mínir látnir. Hannes Hólm­steinn hélt því fram fyrir skemmstu á prenti að faðir minn hefði fengið Rússa­gull fyrir að vera komma-svín og nú kemur í ljós að móðir mín var auð­kýf­ingur. Alla mína blokkar-barna og ung­lina-ævi var mér talið trú um að við værum blönk. Og það sem ég taldi vera stór­kost­legt örlæti móður minnar sem var ávallt til í að deila því sem hún átti með öllum í kringum sig var bara ekk­ert annað en níska, leik­rit sett á svið til að fela raun­veru­lega ríki­dæmið.“

Skjáskot sem Sólveig birtir af Við­skipta­blað­inu.

Sólveig segir að nú þurfi hún bara að finna allt þetta gull. „Nú þarf ég bara að byrja að leita að auð­æf­unum. Ein­hver­staðar hljóta þau að leyn­ast. Ekki veit ég þó hvar. Helst kemur auð­vitað til greina að leita í garð­inum bak við blokk­ina, eða í Mun­að­ar­nesi, þar sem við fórum alltaf í sum­ar­frí af því þau voru jú alltaf að þykj­ast vera svo blönk. Svona eru þessir kommar, alltaf að plata og vera vondir,“ skrifar Sólveig.

Hún seg­ist stefna á að kaupa sér skóflu svo hún geti grafið rússa­gullið meinta upp. „Mig hefur reyndar aldrei langað til að vera rík en hver er ég til að slá hend­inni á móti ann­ars­vegar illa fengnum sovét-auði og hins vegar ríki­dæmi blokkar­í­búðar-eig­and­ans? Sem inni­legur örlaga-trú­ari get ég ekki annað en sætt mig við þetta hlut­skipti. Ég þarf að kaupa mér góða skóflu og byrja svo að moka. Kannski get ég fengið svona ríku-fólks skatt­afslátt útá kaupin?,“ spyr Sólveig.

Stofna klúbb

Hún segir að lokum að nú geti hún stofnað klúbb ásamt öðrum börn auð­stétt­ar­innar. „Svo skulum við blokk­ar­börnin sem vissum ekki að mamma og pabbi væru með­limir auð­stétt­ar­innar stofna klúbb. Alltaf gaman að hitta fólk með svip­aðan bak­grunn og mynda tengsla­net og svona. En ég verð því miður kannski ein í klúbbi þeirra sem bæði eiga rússa­gull og blokkar-auð. Sem er auð­vitað dálítið sad. En ég hlýt að kom­ast yfir það,“ skrifar Sólveig.