Cristopher sá Katrínu grímulausa í Melabúðinni: „Hún var mjög sek á svipinn“

Katrín Jak­obs­dóttir for­sæt­is­ráð­herra var gómuð grímu­laus í Mela­búð­inni. Þetta full­yrðir íbúi Vest­ur­bæjar í færslu á hópi íbúa hverf­is­ins á Facebook. Færslan var síðar fjar­lægð.

„Ég skil þetta ekki. Með allt þetta drama í kringum Trump og Covid þá geng ég inn í Mela­búð­ina með grímuna mína. Á mig starir á móti, án and­lits­grímu, engin önnur en Katrín Jak­obs­dóttir mjög sek á svip­inn,“ skrif­aði Cristopher Hickey í gær.

Verulega hertar sam­komu­tak­mark­anir tóku gildi á mið­nætti um leið og neyð­ar­stig almanna­varna vegna Covid-19. Frá því sem verið hefur eru sótt­varn­ar­að­gerðir hertar svo mjög að þjóð­fé­lagið lam­ast á nýjan leik.

Cristopher undr­ast hvers vegna for­sæt­is­ráð­herr­ann hafi ekki sýnt betra for­dæmi dag­inn fyrir hertar sótt­varn­ar­að­gerðir lands­ins. „Eru ekki að taka við hertar aðgerðir á morgun? Ætti per­sónu í hennar stöðu ekki að leiða með góðu for­dæmi? Eða er Vest­ur­bær­inn of kúl fyrir grímur, jafn­vel þó þú sért for­sæt­is­ráð­herra?,“ segir Cristopher sem átti einnig leið í verslun Hagkaupa:

„Við fjöl­skyldan fórum tvisvar í Hagkaup í síð­ustu viku. Við vorum með grím­urnar okkar en af þeim 100 við­skipta­vinum sem við sáum voru aðeins tveir aðrir með grímur. Enginn virti fjar­lægð­ar­tak­mark­anir og brjálað að gera á nammi­barnum. Reykja­vík, þú upp­skerð það sem þú sáir og það er synd að við hin þurfum að gjalda fyrir það.“

Mannlíf leit­aði við­bragða Katrínar við frá­sögn­inni og til stað­fest­ingar á því hvort hún hafi verið grímu­laust í Mela­búð­inni í gær.

Katrín segir í svari við fyr­ir­spurn Mannlífs að það sé vissu­lega rétt að hún hafi farið og keypt í mat­inn í gær. Hún segir að fáir hafi verið í búð­inni og því taldi hún ekki þörf á grímu. „Það er mik­il­vægt að við tökum öll höndum saman um að fylgja þeim reglum sem gilda um sótt­varnir og ekki síður þeim ráð­legg­ingum sem sótt­varna­læknir gefur. Í versl­unum eru fjar­lægð­ar­tak­mörk og fjölda­tak­mörk en sótt­varna­læknir hefur ekki lagt þar til grímu­skyldu. Um það gilda sömu reglur í dag og giltu í gær.

Það er rétt að ég fór og keypti í mat­inn í gær. Til­tölu­lega fáir voru í versl­un­inni og því lít­ill vandi að gæta fjar­lægð­ar­marka. Ekki er heldur grímu­skylda á Alþingi en þangað mætti ég í morgun til að sitja fyrir svörum. Hins vegar er mik­il­vægt að fólk sé ávallt með grímu við hend­ina þannig að það geti sett upp grímur ef ekki er unnt að virða fjar­lægð­ar­tak­mörk. Þá er grímu­skylda á ýmsum stöðum sem mik­il­vægt er að fylgja, eins og kunn­ugt er,“ segir Katrín.