Björn Bjarnason, fyrrverandi dómsmálaráðherra, er reiður veggjakroturum sem skemmi almannaeignir í borginni. Í gær birti hann myndaseríu á Facebook af undirgöngum við Bústaðarveg sem voru máluð um nýliðna helgi og þau voru orðin spreyjuð strax daginn eftir.
Björn bendir á að undirgöngin hafi orðið fyrir varanlegum skemmdum vegna veggjakrotsins. „Hér eru myndir í undirgöngum Bústaðavegar. Að morgni laugardags 3. október höfðu þau verið máluð og ekki sást veggjakrot. Að morgni sunnudags 5. október hafði enn einu sinni verið krotað á hlaðna veginn fyrir enda ganganna og á norður-inngang þeirra. Að morgni mánudags 5. október hafði verið málað yfir krotið á norður-innnganginum. Svona gengur þetta allan ársins hring. Unnt er að mála gangaveggina en steinhleðslan er varanlega eyðilögð,“ segir Björn.
Gísli Kr. Björnsson tjáir sig undir myndaseríunni. Honum finnst veggjakrotið skemmtilegt. „En svona án tillits til þess hverjir gera þetta, mætti þá ekki hugsa svona veggi einmitt til þess að graffa á? Nú er ég einn þeirra sem finnst graffiti vera skemmtilegt tjáningar og lista form, og vildi gjarnan sá þetta gert skipulega, og þá með list í huga… Það lífgar upp daufu dagana og gefur fallegu dögunum dýpt,“ segir Gísli.
Ari Edwald, forstjóri MS, er sammála dómsmálaráðherranum fyrrverandi um að veggjaspreyjið sé óboðlegt. „Þetta er ömurlegt og brýnt að taka á þessu af alvöru. Gekk nýlega Grettisgötu og þar í kring. Flest heimili höfðu orðið fyrir barðinu á skemmdarvörgum. Það eru ekki bara eignaspjöllin sem eru gríðarleg. Höggið sem fólk upplifir þegar heimili og aðrar eignir verða fyrir slíkum skemmdarverkum og ribbaldahætti er mikið. Þetta er þrúgandi ofbeldi,“ segir Ari.
Karl Gunnarsson tekur undir með Ara og Birni. Honum finnst ekki hægt að réttlæta veggjakrotið sem hann kallar viðbjóð. „Þetta er óþolandi en því miður ekkert nýtt, almenningssímar lifðu varla nóttina og margt annað í almenningseigu varð afar ílla úti, eitthvað sem ekki var með sama hætti í öðrum löndum og menningarsvæðim sem við viljum gjarnan samsvara okkur við,“ segir Karl.
Þórhallur Pálsson tekur líka þátt í umræðunni og er harðorður. Er ekki hægt að vakta þessa „sprautuhausa“ og góma þá ? Og merkja varanlega?, segir Þórhallur.
Athugasemdir