Hjörleifur nokkur Jóhannesson er ósáttur við þá sem hann kallar sófasérfræðinga Íslands. Þá meinar hann alla þá sem telja sig vita best, meira að segja um sóttvarnir landsins og það betur heldur en þríeykið þjóðfræga. Margir eru sammála honum, þar á meðal Bjarkey Olsen Gunnarsdóttir þingkona.
Þetta ritar Hjörleifur í færslu á Facebook sem vakið hefur athygli. „Við lifðum fordæmalausa tíma síðastliðinn vetur. Þjóðin stóð saman, fólk hélt sig til hlés, úr fjarlægð fylgdumst við með því hvernig ástandið fór úr böndunum í löndum allt í kringum okkur. Vissulega hafði þetta áhrif á Íslendinga, fyrirtæki lokuðu, ferðamenn hættu að koma og þjóðin varð hálf dofin. Svo varð allt betra í einni hendingu, tveggja metra reglan varð að einum metra (eða sentimetra í framkvæmd) og þjóðin fylltist bjartsýni,“ segir Hjörleifur.
„Ég geri ekki við mínar eigin tennur, segi mínum tannlækni aldrei hvernig hún á að beita bornum.“
Hjörleifur bendir á að vel hafi gengið í fyrstu og annarri bylgju kórónuveirufaldarsins þökk sé sóttvarnaraðgerðum. En ekki gangi eins vel í þriðju bylgjunni, þökk sé sófasérfræðingunum. „Sú virðist verri en marga óraði fyrir, ekki bara er faraldurinn slæmur, sófasérfræðingar virðast hafa útskrifast í stórum hópum í sumar. Nú herjar á okkur fólk sem veit allt um sóttvarnir og hegðun faraldursins. Heittrúaðir og óþreytandi við að grafa upp allskyns greinar og slagorð. Sannfærðir um að þríeykið okkar sé illa innrætt og bara að leika sér með velferð þjóðarinnar. Fólk sem skrifar nánast eins og veiran sé ekki til sem raunveruleg ógn eða eitthvað sem við ættum að hafa nokkrar áhyggjur af. Þeir sem ekkert vita eru oft manna vissastir um að þeir viti allt um ákveðið málefni. Eftir því sem þekking eykst, eykst efinn. Verði menn sérfræðingar eykst síðan fullvissan, en nær oft ekki nándar nærri sömu fullvissu og hjá þeim sem vita ekkert,“ segir Hjörleifur og bætir við:
„Ég viðurkenni fúslega að hafa ekkert lært í veirufræði og enn minna í faraldsfræðum. Ég ætla Þórólfi ekki að stjórna flugvélinni til London þegar hann sest upp í slíka. Þar eru menn með þá þekkingu. Ég geri ekki við mínar eigin tennur, segi mínum tannlækni aldrei hvernig hún á að beita bornum. Samt á ég stóra borvél með rafhlöðu heima.“
Hjörleifur leggur á það áherslu að Íslendingar treysti áfram þeim sérfræðingum sem fjalla um Covid-19. Þar séu ákvarðanir teknar af fagmennsku frekar en illmennsku. „Það er komist að niðurstöðu sem þykir réttust í hvert sinn. Hvort hún er síðan rétt mánuði síðar er alls ekki víst. Sérfræðingar okkar eiga frekar virðingu okkar skilið og þakklæti fyrir að standa í eldlínunni, því þetta er svo sannarlega eldlína. Nágrannalöndin glíma líka við veiruna, það er staðreynd sem sumum gengur illa að viðurkenna. Öndum með nefinu, stöndum bara saman og hættum að agnúast út í þá sem nú nota þá sérfræðiþekkingu sem við hin höfum ekki,“ segir Hjörleifur ákveðinn.
Athugasemdir