Lögreglan í Namibíu vill fá nokkra lykilmenn Samherja framselda í tengslum við grun um að mútur hafi verið bornar á ráðherra og embættismenn í Namibíu. Lögreglan hefur grafist fyrir um dvalarstað Ingvars Júlíussonar, fyrrverandi fjármálastjóra Samherja á Kýpur, og Egils Helga Árnasonar, fyrrvverandi framkvæmdastjóra Samherja í Namibíu. Þetta kemur fram í Ríkisútvarpinu sem vitnar til gagna sem lögð voru fram vegna rannsóknar á mútugreiðslum og spillingu við gerð milliríkjasamnings um, kvóta á hrossamakríl við Angóla sem reifað er að hafi skilað Samherja næstum 5000 milljóna króna ávinningi.
Réttað er í málinu í höfuðborginni Windhoek
RÚV upplýsir að saksóknari telji það ljóst að Ingvar Júlíusson hafi haft stjórn yfir öllum Namibíufélögum Samherja og að Egill Helgi Árnason hafi sömuleiðis tekið við stjórnartaumunum í öllum félögum sem uppljóstrarinn Jóhannes Stefánsson stýrði áður. Egill Helgi hafi einnig stýrt, ásamt Ingvari, öllum félögum sem stofnuð voru ytra eftir það.
Í yfirlýsingu saksóknarans segir að Nampol grafist fyrir um dvalarstað, meðal annarra, Hr. Júlíussonar og Hr. Árnasonar, í því skyni að fá þá framselda sem stjórnendur fyrirtækjanna sem frömdu brotin fyrir hönd Samherja.
Erindi til Interpol
Namibíska lögreglan sendi fulltrúa alþjóðalögreglunnar Interpol í Namibíu bréf síðastliðið vor. Erindið var að leita liðsinnis Interpol við að finna dvalarstað tíu Íslendinga sem tengjast Samherja.
Auk Ingvars og Egils Helga upplýsir RÚV að namibíska lögreglan nefni í bréfi sínu til Interpol Þorstein Má Baldvinsson, forstjóra Samherja, Aðalstein Helgason, sem var um skeið stjórnandi Samherja í Namibíu, Örnu Bryndísi Baldvins McClure, lögfræðing Samherja, Baldvin Þorsteinsson, son Þorsteins Más og fyrrverandi yfirmann hjá Samherja, Ingólf Pétursson, fyrrverandi fjármálastjóra Samherja í Namibíu, Jón Óttar Ólafsson, fyrrverandi rannsóknarlögreglumann sem starfaði fyrir Samherja í Namibíu, og auk þess tvo starfsmenn til viðbótar sem hingað til hafa lítið komið við sögu í fréttaflutningi af Samherjamálinu.
Auk rannsóknar í Namibíu þá er málið til skoðunar hjá Héraðssaksóknara á Íslandi þar sem Þorsteinn Már Baldvinsson er meðal annarra með stöðu grunaðs manns.
Athugasemdir