Þórir nokkur, íbúi miðborgarinnar, sat á pallinum sínum í hálftíma í hádeginu. Á þeim tíma taldi hann 12 flugvélar og tvær þyrlur á flugi yfir miðbænum. „Það gerir sirka eitt stykki á tveggja mínútna fresti,“ skrifar hann á Facebook síðu fyrir íbúa miðborgarinnar.
Hann heldur áfram: „Mér finnst ekkert að því að heyra í einni og einni flugvél, það er bara partur af borgarhljóðmyndinni. Staðan er hins vegar sú að maður lifir í stöðugum kvíða við að geta ekki klárað eina einustu setningu sem maður byrjar á. Það hlýtur að vera hægt að beina þessu æfingaflugi frá byggð, eða hvað?!“
Þórir virðist ekki vera einn um að vera þreyttur á hljóðmengun flugumferðar yfir miðborginni.
Guðrún nokkur skrifar: „Var á gangi í kirkjugarðinum við Suðurgötu – þetta er einfaldlega óþolandi umhverfismengun.“
„Þetta eru biluð óhljóð og stundum verulegar drunur. Krakkinn vaknaði við eina þyrluna áðan, lætin voru slík að það var eins og hún væri að lenda í bakgarðinum,“ skrifar móðir í miðborginni.
„Það hristist allt og skelfur stundum hérna vegna þessa og samræður í garðinum verða ansi sundurlausar. Engin leið að klára heila setningu eða hugsun stundum,“ skrifar Sigurveig.
Heiða B. Heiðars íhugar hvort svo mikil umferð sé leyfileg: „Velti því fyrir mér hvort það séu ekki einhverjar reglur yfir hvað má í þessum efnum. Ég læt þyrluflug rétt fyrir ofan þakið hérna rétt fyrir miðnætti fara sérlega í taugarnar á mér.“
„Þetta er bara alls ekki boðlegt. Þegar þessum flugvelli var valinn staður voru þetta nokkur flug á ári. Á góðviðrisdögum jaðrar stöðugur hávaðinn í þessum rellum við að vera heilsuspillandi. Þó ég sé algjörlega á móti núverandi staðsetningu þessa flugvallar þá er alveg hægt að sætta sig við ónæðið sem fylgir sjúkraflugi og þessum örfáu áætlanaflugferðum. Útsýnis og kennsluflug er allt annað og finnst mér að það eigi að banna það yfir borginni,“ skrifar Helgi.
Þessi mikla flugumferð virðist að mörgu leiti stafa af þyrlum með fólk á gosstöðvarnar snertilendingaræfingum og. Og spyr fólk sig hvort slíkar æfingar geti ekki farið fram annars staðar: „Er ekki ágætis touch and go flugvöllur á Hellisheiði? Af hverju þarf að gera þetta á Reykjavíkurflugvelli?“
Egill Helgason, sjónvarpsmaður tekur einnig þátt í umræðunni og skrifar: „Það er löngu búið að semja að æfinga- og sportflug fari úr bænum – en svo hafa þyrlurnar bæst við. Sök sér með áætlunar- og sjúkraflug en þetta á ekki heima inni í borg.“
Athugasemdir