Hafliði um heilablóðfallið og meðferðina: „Líkaminn er ekki eilífur“

„Ég þarf alltaf að vera að skapa eitt­hvað. Ef ég er ekki að búa eitt­hvað til, þá verð ég eirð­ar­laus,” segir Hafliði Ragn­ars­son, súkkulaði­meist­ari og bak­ari með meiru, en hann hefur skapað sér sér­stöðu á íslenskum mat­vöru­mark­aði. Hafliði var á dög­unum gestur í hlað­varps­þætti Snorra Björns og ræddi þar umfangs­mik­inn feril sinn og jafn­framt átak­an­legri tíma.

Á meðal sér­greina Haf­steins eru konfekt­gerð, des­ertar og hand­unnin páska­egg sem hafa lengi vakið lukku, en Hafliði er af bak­ara­ætt og er sér­mennt­aður í súkkulaði­gerð. Þá hefur Hafliði oft verið kenndur við heitið „sendi­herra belgíska súkkulað­is­ins“ (e. Ambassa­dor of Belgian chocolate) en tit­il­inn hlaut bak­ar­inn þegar hann lenti í öðru sæti í alþjóð­legri súkkulaði­keppni Belgíu árið 2003. Í þeirri sömu keppni hlaut hann fyrstu verð­laun fyrir eft­ir­rétt og jafn­framt fyrstu verð­laun í flokki sæta­brauðs.

Árið 2010 fór álagið að segja sín sam­kvæmt Hafliða þegar hann fékk alvar­legt heila­blóð­fall og var í kjöl­farið sendur til Sví­þjóðar í átta klukku­stunda aðgerð. Hafliði lýsir aðgerð­inni í kjöl­far heila­blóð­falls­ins sem skugga­legri. „Ég var mjög hepp­inn. Síðan þegar ég kom heim var ég blindur á öðru aug­anu og það var ekk­ert víst hvort það kæmi aftur. Þá kom það aftur og ég þakka fyrir að vera til í dag.”

Að eigin sögn gerði súkkulaði­meist­ar­inn lítið til að snúa blað­inu við og vinna í sínum málum fyrr en nýverið, ára­tug síðar. „Þetta var nýr kafli í mínu lífi og nýtt tæki­færi, en ég fór ekk­ert rosa­lega vel með það í byrjun,“ segir Hafliði. „Ég upp­lifði það tíu árum seinna að lífið er ekk­ert sjálf­gefið og lík­am­inn er ekki eilífur.“

Á yngri árum var Hafliði í hljóm­sveit­inni Glimmer og spurður hvort þeim kafla hafi fylgt mikil drykkja svarar hann ját­andi, þó venjan hafi ekki verið sú í veit­inga­geir­anum. Samkvæmt honum fylgdi kokka­geir­anum svo mikið vinnu­á­lag, út frá þægi­legri rútínu, að það bjarg­aði honum. „Þetta er eins og að vera með ADHD en geta bara eytt orkunni í eina átt. Það var ekki eins mikið rokk og ról í kringum það,“ segir súkkulaði­meist­ar­inn.

Hafliði ákvað að fara í með­ferð þegar honum þótti tíma­bært að snúa blað­inu við. Hann seg­ist hafa gefið upp áfengi og kveðst finna tölu­verðan mun á heils­unni. Þá tók hann einnig upp mynd­list og segir þá athöfn að mála bæði vera gef­andi á sál­ina og upp­fylla einnig þörf hans til að skapa,„Að sjá hluti verða til gefur mér ótrú­lega mikið.”

Þáttinn má finna á heild sinni hér fyrir neðan.