Sólveig Katrín Hallgrímsdóttir verður jarðsungin frá Akraneskirkju í dag en hún lést á þjóðhátíðardaginn, 17. júní, á gjörgæsludeild Landspítalans. Hún var aðeins 44 ára að aldri er hún lést og lætur eftir sig einn son.
Sólveig fæddist 21. júní 1977. Hún stundaði nám við Grunnskólann í Borgarnesi og síðar Fjölbrautaskóla Vesturlands. Ung að aldri eignaðist hún son sinn en síðar lauk hún háskólanámi við Bifröst þar sem hún lauk bæði BS-gráðu og meistaranámi. Að því loknu festi Sólveig kaup á draumahúsi sínu á Akranesi þar
Margir minnast Sólveigar í hlýjum minningargreinum í Morgunblaðinu í dag. Móðir hennar er þar á meðal.
„Elsku Solla mín, að missa barnið sitt er svo mikil sorg að engin orð fá því lýst. Ég á erfitt með að hugsa til þess að þú sért farin. Þakka þér fyrir dýrmætan tíma sem ég fékk að vera með þér. Ég er þakklát fyrir hann. Þú fórst allt of fljótt elskan mín og síðastliðnir dagar hafa verið mjög erfiðir. Það verða erfiðir tímar fram undan en minningarnar um þig munu hjálpa okkur mikið. Nú fæ ég ekki að hitta þig aftur nema í minningum mínum. Fólkið sem farið er á undan okkur tekur á móti þér, gleðigjafinn minn, með hlýju og ást og við sjáumst seinna. Við sendum ást og hlýju þangað til.“
Systir Sólveigar ritar líka falleg og hlý orð til minningar um elstu systur sína:
„Síðastliðnir dagar hafa verið óraunverulegir eftir að elsku besta Solla, elsta systir mín, kvaddi okkur á sjálfan þjóðhátíðardaginn. Það er sárt að vita að ég fái ekki aftur að heyra löngu sögurnar hennar, hláturinn hennar og ákefðina í öllu sem hún gerði en eftir sitja dýrmætar og góðar minningar. Solla var einstök eins og þeir vita sem voru svo lánsamir að kynnast henni. Elsku Solla, takk fyrir allt. Mikið sem það hefði verið gott að fá lengri tíma með þér, en ég mun varðveita minningu þína svo lengi sem ég lifi.“
Útför Sólveigar fer fram frá Akraneskirkju í dag og hefst athöfnin klukkan 13. Streymt verður frá útförinni á vef Akraneskirkju.
Athugasemdir