Blaðakonunni Erlu Hlynsdóttur var heldur betur brugðið á vegasjoppunni Aktu taktu eftir að hafa keypt þar miðstærð af frönskum kartöflum. Ekki aðeins fannst henni verðið hátt heldur kartöflurnar ansi fáar sem fengust afhentar.
Erla gerir upplifun sína að umtalsefni inni í hinum fjölmenna hópi matgæðinga á Facebook, Matartips. Þar birtir hún mynd af kartöfluskammtinum ásamt eftirfarandi texta:
„Hefur miðstærð af frönskum ekki minnkað á Aktu Taktu? Þetta kostaði 999 kr.“
Fjölmargir taka undir með Erlu og furða sig á verðlaginu á staðnum. Sigrún nokkur er ein þeirra. „Vá, dýrt,“ segir Sigrún. Bjarni er þeim sammála. „Litla ruglið, úff,“ segir Bjarni.
Guðrún virðist hafa lent í svipuðu á Aktu taktu. „Keypti snúning og það var minni stærðin á verði stærri sem var en nú er bara hægt að fá eina stærð sum sé minni stærðina á verði sem var á stærri,“ fullyrðir Guðrún.
Þórunn veltir því fyrir sér hvort skyndibitastaðurinn hafi mögulega gert mistök. „Ruglast? Óvart afgreitt litinn,“ spyr Þórunn.
Erla er ekki viss um að þetta hafi verið nokkur mistök. „Ég hef oft keypt miðstærð af frönskum þarna. Þarsíðast fannst mér skammturinn vera svo lítill að mig grunaði að það hefði verið einhver ruglingur. Keypti svo stóran þar á eftir til öryggis og það var nóg fyrir heilan hest. Var þá einmitt sannfærð um að hitt hefði verið mistök og pantaði aftur miðstærð og fékk aftur svona lítinn skammt. Skoðaði þetta auðvitað ekkert fyrr en ég var komin heim,“ segir Erla.
Athugasemdir