Með því að sækja þér sálfræðiþjónustu erlendis frá á netinu geturðu sparað þér um 10 þúsund krónur á viku eða rúma hálfa milljón á ári. Þetta á við ef þú sækir þér vikulega sálfræðiþjónustu vegna andlegra kvilla á hefðbundna sálfræðistofu, greiðir fyrir það 17 þúsund krónur í hvert skipti. Þú skiptir yfir í þjónustu Better Help sem fer alfarið fram yfir myndsímtöl, hefðbundin símtöl og textaskilaboð og sparar gríðarlegar upphæðir.
Better Help bjóða þjónustu á nokkrum tungumálum, þ.m.t. ensku en þó ekki íslensku. Þjónustan kostar um 7.500,- til 10.000,- krónur á viku og felur í sér myndsímtöl, símtöl eða skilaboð eftir því hvað hentar þér hverju sinni. Að hefjast handa er stutt ferli þar sem nýr notandi svarar einföldum spurningalista.
Þegar meðferð hefst er þér úthlutað spjallherbergi með meðferðaraðilanum hvar þú getur átt í spjalli um textaskilaboð allan sólarhringinn. Myndsímtöl og hefðbundin símtöl þarf að bóka, en samkvæmt síðu þeirra er frjálst að bóka sig í alla tíma sem auglýstir eru lausir. Þar kemur einnig fram að erlendar sjúkratryggingar greiði ekki fyrir þjónustuna og því má gera ráð fyrir að slíkt gildi hérlendis líka, en þó er mögulegt að stéttarfélög taki þjónustuna gilda sem sjúkrakostnað.
Þú getur líka sparað þér 140 þúsund krónur með því að skipta út hefðbundinni tíu tíma meðferð við þunglyndi, kvíða, lágu sjálfsmati og félagskvíða fyrir „staðlaða sálfræðimeðferð“ sem fer fram í gegnum verkefnaskil, spurningalista, fræðsluefni og spjall við löggilda íslenska sálfræðinga hjá Mín Líðan. Hægt er að prófa einn prufutíma. Fyrir þetta eru greiddar 39.990,- en Mín Líðan staðhæfir að sambærileg meðferð á stofu kosti u.þ.b. 180 þúsund krónur.
Nú á tímum Covid-19 hefur eftirspurnin eftir þjónustu ýmiskonar sem fer fram á netinu aukist gríðarlega, þar með talin þjónusta heilbrigðisstarfsmanna. Þetta gæti komið sér vel fyrir sum okkar í ljósi þess að Íslendingar eru öruggir heimsmeistarar í notkun kvíða- og þunglyndislyfja miðað við höfðatölu árið 2021.
Athugasemdir