„Væntingastjórnun er það fyrsta sem maður lærir þegar maður greinist með sjúkdóm eins og krabbamein““ segir borgarfulltrúinn Egill Þór Jónsson á Facebook síðu sinni en þar hefur hann fjallað um reynslu sína á því að greinast með eitilfrumukrabbamein aðeins 31 árs gamall, með lítið barn og annað á leiðinni.
Egill var búinn að vera veikur í marga mánuði þegar hann endaði inni á bráðadeild Landspítalans þar sem hann greindist loks með krabbamein. Við tóku sex mánuðir af lyfjameðferðum og innlögnum hjá Agli en á sama tíma gekk kona hans, Inga María með annað barn þeirra. Inga er ljósmóðir og gaf nýlega út bókina „Fæðingin ykkar“ sem er fæðingafræðslubók fyrir verðandi foreldra.
Egill er bjartsýnn og jákvæður í gegn um veikindi sín og segir þetta ferðalag fræðandi og ágætis skemmtun. Eftir samtals sex lyfjameðferðir hafði Egill sigrast á krabbameininu en þremur mánuðum síðar tók það sig upp aftur.
„Niðurstöðurnar voru á þann veg að krabbinn er mættur aftur og næstu skref verða þá frekari rannsóknir. Í kjölfarið verður ákveðið hvaða meðferðir ég fer í. Staðan er því nokkuð óljós sem stendur en einhverskonar lyfjameðferðir eru á næsta leyti“ segir Egill á Facebook síðu sinni. Viku síðar kom dóttir þeirra Egils og Ingu í heiminn og segist fjölskyldan vera jákvæð á að sigra þennan bardaga líkt og þann fyrri.
Athugasemdir