Í morgun hófst aðalmeðferð í máli héraðssaksóknara gegn karlmanni sem ákærður er fyrir skotárás á Egilsstöðum í lok ágúst í fyrra. Mætti maðurinn fyrir dóminn í morgun.
Maðurinn mætti heim til barnsföðurs þáverandi sambýliskonu sinnar, vopnaður haglabyssu en tveir synir barnsföðursins og sambýliskonunnar voru einir heima. Ógnaði hann drengjunum með haglabyssunni á heimilinu en þeir náðu að komast út og fela sig í nærliggjandi skógi. Áður hafði hann beint skammbyssu að sambýliskonu sinni, á heimili þeirra í Fellabæ. Maðurinn skaut innan dyra og utan með haglabyssu og skammbyssu og olli skaða á bílum og húsum og setti íbúa í götunni í mikla hættu með athæfi sínu. Lögreglan mætti á svæðið og skaut manninn í kviðinn að lokum eftir ítrekaðar skipanir um að leggja niður vopn. Var maðurinn í bráðri lífshættu og fluttur á gjörgæslu í Reykjavík þar sem tókst að bjarga lífi hans. Síðan þá hefur hann verið í gæsluvarðhaldi. Í nóvember gaf héraðssaksóknari út ákæru á hendur honum en rannsókn á framgöngu lögreglu var felld niður.
Skotmaðurinn er ákærður fyrir tvær tilraunir til manndráps, brot í nánu sambandi og vopnalagabrot.
Rúv fjallaði fyrst um aðalmeðferðina.
Athugasemdir