Mikið fjaðrafok hefur verið í samfélaginu undanfarið vegna sölunnar á Íslandsbanka en framkvæmd sölunnar hefur verið harðlega gagnrýnd úr mörgum áttum. Fyrir helgi birti Mannlíf skoðanakönnun þar sem spurt var: „Trúir þú að rétt hafi verið staðið að sölu á hlut í Íslandsbanka?“
Niðurstöðurnar voru afgerandi. Þegar þessi frétt er skrifuð hafa 91,4 prósent lesenda svarað neitandi; að þeir telji að ekki hafi verið rétt staðið að sölunni á hlut ríkisins í bankanum. Einungis 6,7 prósent telja söluna hafa farið fram með réttum hætti. Tæp 2 prósent sögðust ekki viss.
Þegar athugasemdakerfið undir skoðanakönnuninni á Facebook er skoðað má sjá að ýmsir hafa sagt skoðun sína á málinu og er sumum heitt í hamsi.
„Ógeðslegt svindl og svínarí,“ skrifar einn lesandi.
„Sá t.d. aldrei auglýst hvenær útboð átti að fara fram, hefði viljað kaupa hlut sko,“ segir annar lesandi og bendir þar með réttilega á að sumir fjárfestarnir hafi verið ansi smáir og því tæplega réttlætanlegt að mati margra að almennum borgurum hafi ekki boðist að fjárfesta fyrir sömu upphæðir.
„Klíkuskapurinn ríður ekki við einteyming á þessum bæ,“ skrifar annar.
Einn lesandi telur að rétt hefði verið að ráðfæra sig við eigendur hlutarins í Íslandsbanka, áður en ráðist var í sölu. „Það átti að gera könnun meðal eigenda bankans, þ.e þjóðarinnar, áður en farið var í ferlið og spyrja hvort selja ætti bankann yfir höfuð. Ég hefði sagt nei, allavega ef BB væri með ferlið í sínum þjófakrumlum.“
Annar lesandi bendir á ágætis þumalputtareglu: „Aldrei rétt að handvelja gæðinga.“
Athugasemdir