Skólastjóri Gerðaskóla í Suðurnesjabæ hringdi í Mannlíf og vildi leiðrétta fréttaflutning sem birtist á miðlinum í gær. Segir hún ekki um brot nokkurra barna á einu barni að ræða.
Í gær sagði Mannlíf frá áhyggjum foreldra í Gerðaskóla sem fengu tölvupóst frá Evu Björk Sveinsdóttur skólastjóra. Í póstinum stóð orðrétt: „Ég fékk ábendingu um að einhverjir nemendur í 6. og 7. bekk væru að setja puttann á sér í rass á öðru barni.“ Segist skólastjórinn svo í póstinum hafa ákveðið að ræða við bekkina um þessa hegðun og hvatti foreldra til að gera slíkt hið sama.
Mannlíf hringdi í Evu Björk í gær og spurði hana út í áhyggjur foreldra af málinu en sumum þótti skólastjórinn líta á málið of léttvægum augum. Eva Björk gaf ekki kost á svari en hún sagðist þurfa að ná flugi.
Í dag hringdi skólastjórinn í Mannlíf og vildi leiðrétta fréttina. „Ég sem sagt sendi póst á foreldra því það var foreldri sem hringdi í mig og sagði mér að þetta væri í gangi á milli krakkanna. Ég hef engar upplýsingar um að þetta hafi verið gegn einu barni,“ sagði Eva Björk og tók einnig fram að hún hefði boðið fólki að hringja í sig ef það vildi frekari upplýsingar en enginn hafi gert það. „Þannig að málið er bara að einhver er að misskilja, þetta var bara á milli krakkanna en ekki beint gegn einu barni.“
Athugasemdir