Sólveig Anna Jónsdóttir, formaður Eflingar, lætur Morgunblaðið og blaðamann þess, Stefán Einar Stefánsson, heyra það í pistli sem hún birtir á Facebook. Hún vísar í frétt Morgunblaðsins þar sem Stefán ræðir við Hörð Ægisson, blaðamann Vísis, og hneykslast þeir á framkomu verkalýðsfélaga.
„Áhyggjur Moggans eru miklar í aðdraganda kjarasamninga, og hafa aukist með afsögn forseta ASÍ. Við þrjú erum agalegt fólk, sérstaklega ég og Ragnar Þór þar sem að við dirfumst að hafa þá skoðun að áherslur stærstu félaganna innan vébanda Alþýðusambandsins eigi að hafa vægi í stefnumótun og afstöðu sambandsins. Svoleiðis glæpahugsun hugnast ekki talsmanni lítilmagnans, ritstjóra Morgunblaðsins og enn síður Stefáni E. Stefánssyni og vini hans Herði Ægissyni en um kjarasamnings-vangaveltur þeirra má lesa á síðum Mbl og þaðan koma myndin og fyrirsögnin sem hér fylgir af okkur í Engisprettufaraldrinum,“ segir Sólveig og vísar fyrrnefnda frétt þar sem fyrirsögnin er „Hóta verkföllum áður en sest er við samningaborðið“
Hún bendir svo á að valdstéttin hafi verið fyrri til að hóta öllu illu. „Það væri nú gaman ef að einhver með heila skrifaði grein, eða jafnvel leiðara, þar sem bent væri á að bæði Þjóðhagsráð og Seðlabankastjóri hafa tilkynnt að vinnuaflið skuli ekki láta sig dreyma um launahækkanir, svigrúmið sé einfaldlega á þrotum. Og að Seðlabankastjóri og skýrslu-höfundar Þjóðhagsráðs hafi komist að þessari niðurstöðu áður en að samningaviðræður eru hafnar, jafnvel þó að það sé ekki þeirra að semja um kaup og kjör heldur sé það lögbundinn réttur vinnandi fólks. Og að með þessu sé valdastéttin að opinbera ólýðræðislega afstöðu sína til þeirra sem vinna vinnuna, og biturð yfir því að ekki hafi tekist að smala okkur inn í Salek-réttina, eins og átti að vera búið og gert fyrir löngu svo að hægt væri að mata okkur á svigrúms-prósentum eigenda okkar í Svörtuloftum, fjármálaráðuneytinu og Borgartúni.
Þið megið endilega láta mig vita ef að þið rekið augun í svoleiðis texta.“
Athugasemdir