Auðunn Blöndal, fjölmiðlamaður og leikari, vann 1757 evrur, tæplega 250 þúsund krónur, er hann veðjaði á úrslit Manchester United og Liverpool í gærkvöldi.
Stórleikur þriðju umferðar í efstu deild Bretlands í knattspyrnu var leikinn í gær en þá mættust erkifjendurnir í Manchester United og Liverpool. Stuðullinn hjá veðbönkum var ansi hár hjá heimamönnunum í Manchester enda byrjuðu þeir tímabilið afleitlega.
Auðunn Blöndal virðist hafa fundið á sér að Liverpool-menn myndu sýna fáséða linkind í leiknum og veðjaði því á sigur Manchester. Stuðullinn var um 5 og því ágætis peningur í boði fyrir þá sem lögðu háar upphæðir á þann sigur. Heimamenn unnu leikinn 2-1 og vann Auðunn heilar 1.757 evrur eða 247.016 kr. og 63 aura.
Þegar ljóst var að fjölmiðlamaðurinn góðkunni hefði unnið veðmálið skrifaði Daníel nokkur á Twitter-reikning Blöndals, að Barnaspítali Hringsins „hefði frekar þegið þessa gjöf“. Auðunn tók vel í þá hugmynd og ákvað því að gefa barnaspítalanum peninginn og gerði gott betur. Hann skoraði á veðbankann, Coolbet Island að gefa sömu upphæð til Hringsins.
Athugasemdir