„Það er heiður að gera lag með þjóðarskáldi. Þegar Bubbi bað mig um að vinna með sér gat ég ekki annað en sagt já. Sem krakki mæmaði ég með Utangarðsmönnum, spilaði á luftgítar, hoppaði í rúminu og þóttist vera á sviði einn inni í herbergi. Fjöllin hafa vakað er fyrsta lagið sem ég lærði á gítar. Núna er ég að gefa út lag með honum,“ segir tónlistarmaðurinn Auður um nýtt lag sem hann og Bubbi Morthens gáfu út á miðnætti.
Lagið, Tárin falla hægt, er þeirra fyrsta samstarfsverkefni. Stórir gítarar, stríðstrommur og angurvær hljóðheimur einkenna lagið.
Bubbi Morthens er hæstánægður með samstarfið.
„Frá því ég heyrði í Auð í fyrsta skipti vissi ég að þarna væri kominn listamaður sem hefði vægi. Og ég hugsaði: Ég verð að vinna með honum einn daginn,“ segir hann.
Lagið er samið af þeim báðum en upptökustjórn og helsti hljóðfæraleikur var í höndum Auðuns. Á bassasyntha spilar Magnús Jóhann Ragnarsson, hljóðblöndun var unnin af Styrmi Haukssyni, ljósmyndina tók Vignir Daði Valtýsson og lagið er gefið út af Öldu Music.
Bubbi hefur nú sýnt yfir 100 sýningar af söngleiknum Níu líf í Borgarleikhúsinu sem var jafnframt valin sýning ársins á Grímunni. Auður var tilnefndur til Grímunnar fyrir tónlist sína í Rómeó og Júlíu í Þjóðleikhúsinu. Lagið er komið á Spotify og er að finna hér.
Tárin falla hægt
ég er fífl ég er skúrkur
ég hef séð tár, grátandi stúlkur
brennt þorp, kirkjur og brýr
bálför sem reyndist mér dýr
hef misst kjarkinn, ég hef séð þokuna
kraftaverk, dauða og heimsenda
ég hef dottið hrapað í holurnar
stend upp hvern dag og drep innri dópista
ég hef séð reykinn
tekið pillurnar
ég hef kysst stelpur
gert þær einmana
tárin falla hægt
sem að vega mest
ég er skíthæll,
ég er snillingur
aðeins guð mun klára mína setningu
tárin falla hægt
sem að vega mest
fólkið hatar mig
elskar mig
aumingi og þjóðargersemi
hirðfíflið, kóngurinn
ruddi, eðalmenni, dólgurinn
ég er málverkið
ég er pensillinn
ég er misheppnuð saga og fyrirmynd
gamall úlfur, burðast með þröskuldinn
ég er naglinn, andinn og sonurinn.
Athugasemdir