Í dagbók lögreglu á höfuðborgarsvæðinu má sjá að nóttin hefur veriði æði annasöm enda margar tilkynningar skráðar. Ber þá helst að nefna að óskað var eftir aðstoð lögreglu að veitingahúsi í miðborginni. Þar var þver einstaklingur sem lét sér ekki segjast og neitaði að borga reikninginn sinn og hann óskaði sjálfur eftir aðkomu lögreglu. Viðkomandi var því fluttur á lögreglustöð þar sem honum kynnt að hann yrði kærður fyrir fjársvik. Hann gekk því næst laus og saddur út í laugardagskvöldið.
Þá barst tilkynning um einstakling sem sveiflaði hníf hægri og vinstri í miðborginni. Var hnífasveiflarinn handtekinn grunaður um vopnalagabrot og vistaður í þágu rannsókn málsins.
Tilkynnt um veiðiþjófnað í Kópavogi. Er lögreglumenn komu á vettvang hittu þeir veiðimanninn og tilkynntu honum að ekki væri leyfilegt að veiða í ánni. Þar sem hann var aflalaus var hann því laus allra mála.
Lögreglunni barst tilkynning um bifreið sem underlegt nokk var uppi á grjóti. Lögreglan hafði upp á skráðum eiganda sem kvaðst ætla að gera viðeigandi ráðstafanir varðandi bifreiðina.
Víða úr borginni bárust tilkynningar um slagsmál og ólæti sem og einstaklinga sem voru í annarlegu ástandi sökum ölvunar og notkunar vímuefna.
Athugasemdir