Anna Kristjándsdóttir er tíðrætt um hita í nýjustu dagbókarfærslu sinni.
Ein vinsælasta dagbók internetsins, fyrir utan kannski dagbók Önnu Frank, er dagbók Önnu Kristjánsdóttur vélstjóra, en hún birtir eina blaðsíðu á hverjum einasta degi ársins. Í nýjustu færslunni hælir hún veðrinu á Tenerife, sem hún kallar Paradís. Segir hún þó að Íslendingar á eyjunni „væli“ yfir hitanum, bæði ferðamenn og þeir sem búið hafa í Paradís í nokkur ár. Minnist Anna á hitann sem oft var óbærilegur inni í vélarrúmi skipa þar sem hún vann á sínum yngri árum. Svo mikill var hitinn eitt sinn að henni sveið í andlitið.
Í niðurlagi færslunnar skiptir Anna skyndilega um stefnu og talar um Íslandsbankamálið og er greinilega með sterkar skoðanir á því. Afsakar hún sig svo í blálokin: „Afsakið mínar kæru lesendur, en þegar spillingin er svona augljós, þá á ég til að missa mig sem var ekki ætlunin, enda þekki ég marga heiðarlega og góða hægrimenn, þótt ég sé þeim ósammála í pólitík.“
Færsluna má lesa hér að neðan:
„Dagur 1416 – Veðrið í Paradís.
Undanfarna daga hefur verið hið ágætasta veður í Paradís. Hitinn á daginn hefur farið upp í 33°C og vart farið niður fyrir 21°C á á nóttunni. Það hefur verið glaðasólskin flesta daga og ekki yfir neinu að kvarta.Og þó.Íslendingar sem koma hingað væla eins og stungnir grísir yfir hlýindunum og óska þess að það kólni sem fyrst. Jafnvel Íslendingar sem hafa búið hér um nokkurra ára skeið eru líka farnir að kvarta yfir hitanum. Þeir gera sér enga grein fyrir því að það er bara hollt að svitna aðeins sem bendir á að líkamsstarfsemin og stærsta líffærið, húðin er í góðu lagi og vinnur eðlilega.—–Ég var einu sinni á mt Esso Aalborg, gömlu dönsku tankskipi á milli bekkja í Vélskólanum með 13.700 hestafla Burmeister&Wain aðalvél. (fyrir eldri vélstjóra, þá var mynd af henni í dönsku Christian Knak vélfræðibókinni). Ég var aðstoðarvélstjóri þarna um borð, í dagvinnu á siglingum en á dæluvakt í höfnum og var mikið að vinna á verkstæðinu sem var ofan við aðalvélina og hitinn fór iðulega yfir 40°C á verkstæðinu. Þá var dálítið erfitt að vera í erfiðisvinnu.Löngu síðar var ég vélstjóri á Laxfossi (III) ex City of Hartlepool með furðulegustu aðalvél sem ég hefi komið nálægt, Doxford 58SJ3 og var stærðar kælivatnstankur niðri á neðsta gólfi í vélarúminu. Sá virkaði eins og 40 fermetra ofn og þegar siglt var á Ameríku að sumri til fór hitinn í vélarúmi upp í 50°C svo að manni sveið í andlitið af hitanum. Svo var tankurinn einangraður og hitinn varð bærilegur eftir það.Eftir reynsluna af þessum tveimur skipum verður 30°C hitinn eins og lélegur brandari. En látum Íslendingana kvarta. Þeir munu hinsvegar ekki kvarta þegar kemur að næstu kosningum, reyna að telja sjálfum sér trú um að gjörspillt Bankasýsla ríkisins hafi gert best heppuðu sölu ríkiseigna sem þekkist í gjörvallri Íslandssögunni þegar hluti Íslandsbanka var seldur vildarvinum Flokksins og nánustu ættingjum fjármálaráðherrans í lokuðu útboði til vildarvinanna, mæta svo á kjörstað og kjósa sömu spillinguna og frændhyglina aftur yfir sig.—–Afsakið mínar kæru lesendur, en þegar spillingin er svona augljós, þá á ég til að missa mig sem var ekki ætlunin, enda þekki ég marga heiðarlega og góða hægrimenn, þótt ég sé þeim ósammála í pólitík.“
Athugasemdir