Dagur B. Eggertsson vill finna lausn fyrir bræðurna í Kjötborg en Reykjavíkurborg hefur nú ákveðið að hefja gjaldtöku í hverfi verslunarinnar.
Borgarstjóri Reykjavíkur, Dagur B. Eggertsson segir að fjölmargir hafi heyrt í honum og bent á að lausn þurfi að finnast fyrir bræðurna í Kjötborg í Vesturbænum vegna þeirrar gjaldtöku sem borgin hefur ákveðið að leggja á bílastæði í hverfinu en þeir bræður hafa um árabil verið með heimsendingaþjónustu á vörum sínum og því er gjaldtakan afar íþyngjandi fyrir þá.
„Les í fréttum að þeir Kristján og Gunnar séu að spá í að reyna að ná tali af mér – sem við hljótum að geta komið í kring,“ segir borgarstjórinn í færslu á Facebook.
Í færslunni segir hann að það hafi verið eitt hans fyrst verk í embætti árið 2014 að útnefna þá bræður Reykvíkinga ársins „þótt þeir hafi reyndar ekki geta gefið sér mikinn tíma til að veiða í Elliðaánum – Kjötborg þurfti að opna! Ég fór því með lax til þeirra seinna sama dag, sbr meðfylgjandi mynd.“
Dagur útskýrir svo ástæðuna fyrir gjaldtökunni en hann segir hana tilkomna vegna „mikillar fjölgunar bílaleigubíla og langtíma geymslu á bílum í íbúðahverfum nálægt miðborginni.“ Þá segir hann að borgin komi til móts við íbúa með sérstökum íbúakortum. „Það er hárrétt ábending að skynsamlegt getur verið að finna lausnir fyrir rekstraraðila sem falla undir nærþjónustu því það er sannarlega stefna borgarinnar að efla hana. Kaupmaðurinn á horninu er mjög mikilvægur til að gera hverfin sjálfbær.“
Að lokum segist Dagur vilja finna lausn á þessu og bendir á að í erlendum borgum séu til einhverjar fyrirmyndarlausnir sem borgin hljóti að „geta skoðað hratt og vel.“ Bætir hann svo við: „En fyrsta skref er að bjóða þeim bræðrum í kaffi og fara yfir málin. Kjötborg lengi lifi!“
Athugasemdir