Hin 32 ára gamla Stephanie Mahoney slapp naumlega við fangelsisvist í gær eftir að hún hafði ofsótt fyrrverandi kærasta sinn og móður hans í marga mánuði. Stephanie, sem búsett er í Liverpool, brást illa við þegar kærasti hennar endaði samband þeirra og laug því að honum að hún væri þunguð. Kærastinn ákvað þrátt fyrir það að fara frá henni en hóf hún þá herferð gegn honum og móður hans á samfélagsmiðlum. Móðirin sagði fyrir dómi að fyrrverandi tengdadóttirin hefði gert líf fjölskyldunnar að „lifandi helvíti“.
Stephanie birti myndir af fyrrverandi kærastanum á samfélagsmiðlum og sagði hann hafa neytt sig í fóstureyðingu. Við eina myndina skrifaði hún: „Þetta er maðurinn sem gerir stúlkur óléttar og neyðir þær síðan í fóstureyðingar.“ Þá deildi hún heimilisfangi mannsins sem búsettur var hjá aldraðri ömmu sinni. Eftir nokkurn tíma ákvað Stephanie að beina spjótum sínum að móður mannsins og póstaði myndum af fóstureyðingum á Facebook-reikning hennar. Við myndirnar skrifaði hún: „Svona vill (mamma fyrrverandi maka) að barnabarnið sitt líti út, í molum“. Í annarri færslu bætti hún við: „Af hverju viltu að barnabarnið þitt sé rifið í sundur?
Maðurinn hélt því ávallt fram að ekkert barn hafi fæðst og að Stephanie hafi í raun aldrei verið þunguð. Hegðun Mahoney var í kjölfarið kærð til lögreglu og voru ótal falsaðir samfélagsmiðlareikningar tengdir við IP tölu hennar. Hún neitaði að vera ábyrg fyrir reikningunum og hélt því fram að fyrrverandi kærasti hennar væri „á bak við alla reikningana og þetta væri tilraun hans til að ná í hana“.
Að lokum fengu maðurinn og fjölskylda hans nálgunarbann á Stephanie. Lögmaður hennar sagði fyrir dómi að sambandsslitin hefðu haft gríðarlega slæm áhrif á skjólstæðing sinn. Hún hafi viljað færa sársaukann yfir á aðra en hún sjái nú hversu röng hegðun hennar var. Hún sé miður sín og biðjist afsökunar. Fjölskylda mannsins er enn að jafna sig eftir áreitið og sagði maðurinn að andlegt ástand hans væri enn slæmt eftir allt sem hann þurfti að þola.
Athugasemdir