Steinunn Ólína Þorsteinsdóttir er afskaplega rómantísk að eigin sögn. Hún viðurkennir að hafa neytt ólöglegra fíkniefna á ævinni og segist hafa lært að meta augnablikið þegar hún meðal annars fylgdi Stefáni Karli sínum í dauðastríði hans.
Uppáhaldsstaður á Íslandi?
Þeir eru nokkrir, Strandir eins og þær leggja sig, N-Þingeyjarsýsla, hálendi Íslands og auðvitað allar almenningssundlaugar landsins.
Á forseti að sitja lengur en tvö kjörtímabil?
Mér finnast 2-3 tímabil eðlileg í þessu embætti en það fer eftir farsæld forseta hverju sinni. Það er mikilvægt að fólk þekki sinn vitjunartíma.
Hvaða breytingar viltu sjá á stjórnskipan Íslands?
Ég eins og stór hluti þjóðarinnar vil tryggja yfirráð yfir auðlindum okkar eins og kveðið er á um í stjórnarskránni nýju og lýsir vilja þjóðarinnar í þeim efnum.
Hver er þinn uppáhalds forseti?
Ég fékk að taka í hönd Kristjáns Eldjárns þegar ég var stelpa og það fannst mér merkilegt. Mér þykir vænt um Vigdísi, hún breytti heiminum, Ólafur Ragnar er eldskarpur og vogaður. Mér finnst eftirsjá af Guðna sem hefur verið okkar alþýðlegasti forseti. Alþýðurbragur á embættinu finnst mér af hinu góða.
Finnst þér að gera eigi kröfu um fleiri fjölda meðmælenda frambjóðenda til embættis forseta Íslands?
Nei.
Hver er þín helsta fyrirmynd í lífinu?
Engin ein manneskja.
Hver er uppáhaldstónlist þín?
Ég elska klassíska tónlist, jazz og reyndar er ég alæta á tónlist.
Hefurðu neytt ólöglegra fíkniefna?
Já, auðvitað hef ég prófað margt misgáfulegt um ævina.
Gerði Ólafur Ragnar Grímsson rétt með því að beita neitunarvaldinu á sínum tíma?
Já.
Hver var stærsta stundin í lífi þínu?
Þær eru margar. Þegar ég varð ástfangin fyrir alvöru, fæðing barnanna minna, að fylgja manninum mínum í gegnum sitt dauðastríð. Ég er lánsöm finnst mér og hef fengið að upplifa margt bæði gott og slæmt og það hefur kennt mér að meta augnablikið.
Hver eru mestu vonbrigðin?
Ég græt ekki það liðna. Hvert augnablik er nýtt upphaf.
Fallegasta ljóðið?
Þau eru svo mörg en, Hvert örstutt spor, eftir Halldór Laxness er í sérstöku uppáhaldi hjá mér og ég hef kunnað það frá því að ég man eftir mér.
Besta skáldsagan?
Sjálfstætt fólk eftir Halldór Laxness, 100 ára einsemd eftir Gabriel García Márquez og Freedom eftir Jonathan Franzen eru allar í uppáhaldi.
Hvað er það besta við Ísland?
Fólkið, náttúran, sundlaugarnar.
Kanntu á þvottavél?
Viltu að ég þvoi eitthvað fyrir þig? Komdu bara með þvottinn!
Ef þú ættir eina ósk, Íslendingum til hagsbóta, hver væri hún?
Að þjóðin gæti stolt horft í augu annarra þjóða, hvorki af yfirlæti eða undirgefni og staðið óhrædd með sjálfri sér og hagsmunum sínum.
Að þínu mati, hvert er helsta hlutverk forseta Íslands?
Að vera hlýr félagi sem sýnir væntumþykju sína í verki með því að meta alla landsmenn jafnt.
Borðarðu þorramat?
Ekki hrifin af súrmat en vitlaus í hákarl.
Ertu rómantísk/ur?
Afskaplega.
Í stuttu máli; hvers vegna ætti að kjósa þig til embættis forseta Íslands?
Ég mun alltaf standa með fólkinu í landinu enda hef ég sömu hagsmuna að gæta. Það þýðir einfaldlega að verði ég forseti mun ég ekki nýta starfið mér til framdráttar eða til sérhagsmunagæslu útvaldra heldur ætíð hafa athyglina á velferð landsmanna. Það get ég gert með því að veita því brautargengi sem mikilvægt og vel er gert og er landsmönnum og náttúru til góða. Það get ég líka gert með því að hvetja fólk og samfélög á landsvísu til dáða. Ég er komin af verkalýðs- og jafnréttisbaráttufólki og engum ætti að dyljast skoðanir mínar. Ég mun nýta dagskrárvald mitt sem forseti líkt og margir forsetar hafa gert ef þingið vinnur gegn almannahagsmunum og séu þjóðarhagsmunir undir þá mun ég nýta málskotsréttinn sé fyrir því ríkur þjóðarvilji.
Mannlíf lagði spurningalista fyrir þá frambjóðendur sem náð hafa lágmarksfjölda meðmæla, svo þjóðin fái að kynnast þeim betur. Munu svör frambjóðendanna vera birt á næstu vikum.
Athugasemdir